食完會變靚啲？觀塘呢個商場最近有個日本火鍋品牌進駐，餐廳係塚田農場副線，價錢貼地。主打招牌黃金骨膠原美人雞湯，食材都係用日本新鮮地道食材，所以話火鍋都可以食得健康㗎！

美人鍋套餐($168)

湯底當然要試佢嘅招牌黃金骨膠原美人雞湯，用產自日本農場，不含激素、荷爾蒙及抗生素嘅走地雞，再花上八小時熬製。雞湯以啫喱狀呈上，淨係望住都都感覺到滿滿骨膠原啊！湯底雖然濃郁，但食落一啲負擔感都無～

配料方面包括一份自選雞肉或豚肉、免治雞肉、蔬菜盛合及一份飯或麵。蔬菜盛合供應多款特色蔬菜，如水耕菜、舞茸菇、靈芝菇、意大利青瓜、紅心蘿蔔及粟米芯等。

最後必做嘅梗係用個雞湯底嚟煮返個飯或麵啦！日本雞蛋雜炊吸收滿滿雞湯精華，而呢隻日本羽衣麵香港較少見，麵質彈牙，食完真係好滿足！

大胃王唔夠飽都可以自行追加配料，和牛西冷有牛味之餘仲入口即溶，三文魚餃有淡淡魚香。

生春卷三款盛合($138)

餐廳仲有供應小食同丼飯套餐，生春卷三款盛合包括海老牛油果美人卷、三文魚牛油果美人卷及帆立貝芒果美人卷，一次過可以食晒三個味，味道清新，做開胃菜就最啱～

美人丼套餐($158)

唔想shabushabu都有丼飯套餐揀，呢個胡麻醬油火灸三文魚配鱈魚子丼套餐都在水準之上！

自助區供應多款日式醬料，加88蚊仲可以任飲自助吧區超過20款特色飲品添，鍾情日式shabushabu嘅朋友要mark低啦！

美人鍋   

地址: 觀塘觀塘道418號創紀之城五期(apm)3樓L3-L13號舖

<

文、相、片: Yanica