台式茶飲店開到成行成市，無返啲噱頭又真係幾難突圍而出！台灣過江龍沐白小農進駐元朗，呢間茶飲主打百分百純天然無添加，唔加任何一滴水，堅持用新鮮牛奶，唔會用奶粉、奶霜，糖都選用全天然蔗糖同黑糖！

沐白香港負責人Eve就話，當初佢同拍擋去完台灣飲過杯芋頭鮮奶一試難忘，就想將呢個味道帶返香港。不過其實傾代理嘅過程都唔係好順利，因為佢地都有幾個競爭者，但台灣方負責人就覺得佢地好有熱誠，所以就決定將個代理權交比佢地。

大甲芋頭鮮奶($30)

招牌大甲芋頭鮮奶，用咗台灣最著名嘅大甲芋頭，呢隻芋頭比起其他較綿密，重芋頭香，而且仲會香甜啲，牛奶用明治牛奶，無額外添加任何糖，只靠芋頭甜味，飲落就係自然芋頭香同新鮮牛奶嘅味道。

草莓鮮奶($35)

用左智利新鮮士多啤梨，雪成冰後打成蓉，為咗令味道自然，堅持唔加士多啤梨醬。果蓉配上鮮奶飲落就較fresh！

抹茶鮮豆乳(M $26/ L $30)

沐白小農仲有一系列嘅豆乳飲品，就算對奶類敏感或素食者都無有怕，仲有抹茶、紅茶、綠茶、鐵觀音烏龍、青茶、冬瓜同布丁口味揀！抹茶選用日本抹茶，抹茶味香濃。

鐵觀音烏龍拿鐵(M $24/ L $28)

茶類飲品大部分選用台灣茶葉，茶味好香，而且茶同奶嘅比例啱啱好！

沐白黑糖波霸鮮奶($30)

當然唔少得最近好hit嘅黑糖珍奶，呢度嘅珍珠會連埋黑糖一齊慢煮2個鐘，每食一粒珍珠都感受到濃濃嘅黑糖味。

負責人仲話佢地嘅目標唔單止係年青人，店內大部份飲品都可以轉做熱飲，就算係較養生或年紀大嘅人都啱飲。

沐白小農

地址: 元朗裕景坊27-31號金倫大廈地下4號舖

文、相、片：Yanica