海鮮丼飯大大碗，刺身款式多又排得靚靚仔仔，一直都深受香港人歡迎。旺角最近有間主打刺身丼飯嘅餐廳新開張，無論係招牌、裝修定係丼飯，都好sharp，更有專為打卡客而設嘅火燒卷物。

 乜蟹都有丼 $128

以吸睛度嚟講，每日限量供應嘅乜蟹都有丼絕對係首位，大大個蟹蓋蓋過咗半隻碗，揭開重見有蟹膏、蟹肉、蟹鉗、蟹籽、蟹棒鋪滿晒成個碗，係豐富嘅，啖啖都食到蟹嘅味道感覺真好。

 虎燃四皇丼 $118

呢個橙白官配嘅丼飯包括咗有左口魚邊、三文魚、蟹棒、赤蝦同蟹籽，以火槍輕輕燒過，食落有微微嘅焦香。自選醬汁有海膽醬，明太子醬，韓式辣醬，蜜糖芥辣醬，芝士蟹籽醬選擇。

 月肝肝鰻魚丼 $148

鍾意食鰻魚嘅朋友就可以揀月肝肝鰻魚丼，有唔少肥厚嘅鰻魚圍住大大嚿鵝肝呢，熱量高但滿足感都高。

 挑機丼燃大胃王$208

呢碗挑機丼燃大胃王可以話係貪心仔專屬，一碗有齊晒三文魚腩、牡丹蝦、大拖羅、鮑魚、帶子、蟹肉、蟹鉗、三文魚籽同蟹籽等多款刺身同海鮮，樣樣都有得食下。

 丼然係盲盒  $188

如果想要啲驚喜嘅，有款叫丼然係盲盒介紹返。話明係盲盒就梗係唔知入面會有啲咩啦，但可以保證嘅係份量加倍咗，而且係由廚師每日挑選最新鮮嘅飛機貨食材放入去，好似開飯仔採訪當日咁，就有Menu上冇見到嘅海膽啊~

  焦糖三文魚卷 $68

除咗各款丼飯外，餐廳亦有小食同卷物供應。打卡必點焦糖三文魚卷，上枱後會喺客人面前點火，然後就有個火圈圍住啲三文魚卷，都幾有視覺效果。師傅特意加入咗焦糖，食落會比平時食嘅多咗份微甜感。

丼燃食堂
地址: 旺角花園街3-5號鴻威大廈地下6號舖

文、相：Kar