近年除咗精品咖啡，Bean to bar、單品朱古力等概念亦逐漸興起。有興趣想知多啲，不妨嚟大坑呢間新開嘅Cafe試試。皆因佢哋主打嘅就係精品朱古力！每期都有嚟自唔同產地嘅單品朱古力，仲有個甜品拼盤畀大家從可可殼食到可可果肉，鍾意食朱古力嘅朋友必試。
 

CHOKOHOOD店名取自「CHOCOlate」同「childHOOD」，將大家細個食朱古力嘅開心回憶，變成長大後可以細味精品朱古力嘅愉快體驗。除咗會用各款單品朱古力製作飲品，仲會用可可茶、可可蜜等製作飲品同甜品。亦有供應自家烘焙糕點同輕食，選擇多元化。
 

單品朱古力即係只用單一產地嘅可可製作嘅朱古力，唔同產地會有唔同風土味，概念同單品咖啡好似。小店現時有台灣屏東、泰國莊他武里、厄瓜多三個產區嘅單品朱古力選擇，會先將朱古力切碎融化成朱古力漿，再調配成飲品。
 

Single Origin Chocolate（Ecuador 72%）（$53/熱，$57/凍）

鍾意可可味濃郁啲嘅話可以試厄瓜多嘅72%單品朱古力，熱飲會加入牛奶沖調，再灑上可可粉點綴。口感柔滑而唔會太濃厚，而且充滿可可香，帶少少西梅嘅甜感，飲完成杯都唔會覺得膩！
 

Single Origin Chocolate（Thailand Kad Kokoa 70%）（$53/熱，$57/凍）

泰國大熱手工朱古力品牌Kad Kokoa出產嘅呢款70%朱古力會帶熱帶水果風味，加上調配凍朱古力飲品嘅時候仲會加入可可蜜同冰搖勻，再將冰隔走倒入事先冰好嘅玻璃杯當中，咁就唔怕啲冰融化會變淡啦。凍朱古力口感亦相當圓滑，甜味似芒果、好易入口。
 

Classic Italian Hot Chocolate（$45）

上面兩款口感比較似Latte，如果想飲味道香醇濃稠嘅熱朱古力，咁呢杯傳統意大利熱朱古力就啱晒！加咗可可粉同粟粉沖調，朱古力味同甜度都係最香濃，厚身得嚟又唔會話飲完喉嚨會唔舒服。
 

Cold Brew Cacao Tea（$62）

可可茶相對就比較清爽，將嚟自台灣屏東嘅可可薄殼、豆仁烘焙而成嘅可可碎粒冷泡，茶湯帶可可嘅發酵香味同甜味，但就少咗朱古力嘅濃厚口感。上枱嘅時候會附上可可碎粒同可可蜜，大家可以先聞下可可碎粒嘅香氣，品嘗可可茶原味，然後按自己喜好加入可可蜜。
 

Cacao Fruit Soda（Strawberry Blueberry Pea Flower）（$60）

可可蜜係用可可嘅白色果肉同豆殼製作而成，比起可可香更接近山竹嘅清甜味！小店就以可可蜜設計出兩款梳打，呢款配搭士多啤梨、藍莓同蝶豆花茶，漸層賣相好啱打卡之餘，味道亦無想象中咁甜膩，而係酸甜平衡，加上氣泡口感清涼提神。
 

Chokohood Party（$128）

朱古力控必點嘅Signature Tasting Flight！小店更特別設計餐墊，詳細介紹每一款甜品係用咗可可嘅邊一部分製作，從可可食到朱古力，建議先食有可可碎粒嘅雪糕，到用咗可可蜜嘅Panna Cotta，而味道最濃郁嘅黑朱古力泡芙留到最後食。

（左上）Salted Caramel Ice-cream with Chocolate Waffle Cone Dipped in S.O. Chocolate Sauce & Cacao Nibs，（右上）Panna Cotta with Cacao Fruit Syrup，（左下）Dark Chocolate Choux，（右下）Cacao Tea

雪糕筒裡面嘅朱古力醬非常香濃，而雪糕配可可碎粒一齊食，唔單止增加口感亦更有可可香。意式奶凍喺食之前將可可蜜唧喺中間，奶凍口感綿滑入口即化，後韻係可可蜜嘅清甜。黑朱古力泡芙嘅夾心係朱古力香最濃郁嘅，略為可惜嘅係泡芙皮比較軟。
 

Pasta（Green）（$118）

唔食朱古力嚟到又唔代表無嘢食嘅，呢度亦有咖啡、鹹食同蛋糕供應。青醬意粉選用彈牙掛汁嘅手卷意粉，加上自家製青醬同蕃茄仔，香草同芝士嘅香氣十足，分量亦唔少、細食朋友當Lunch絕對夠飽。
 

CHOKOHOOD
地址：大坑銅鑼灣道90-96號地下92(E)號舖

文、相：Cathy.H