繼牛油果篇（重溫傳送門按此）後，《OHealth!》專題繼續同大家發掘唔同營養食材嘅可能性。第2種要登場嘅食材就係——食用真菌！

唔同國家嘅菜式都經常會用到食用真菌呢種食材，如中菜就有冬菇、金菇、雞脾菇等，而西餐都會使用蘑菇、大啡菇，或較名貴嘅牛肝菌、松露等烹調菜式。食用真菌類除咗味道香濃，各有特色外，佢哋對身體都有唔同功效，真係好味又健康呀。今次介紹5種生活中常見嘅食用真菌類畀大家，等大家食嘅同時都了解到有咩營養同功效～

防止血管硬化 黑木耳

被稱為身體清道夫嘅黑木耳有好多好處～首先可以防治心血管疾病，因為含有維生素K、豐富嘅鈣同鎂等礦物質，可以減少血液凝塊、防止動脈內膜增厚、管壁硬化，令血液流動順暢，緩和冠狀動脈粥樣硬化等症狀。另外更可以提升免疫功能、降低膽固醇、控制血糖同補鐵補血。喺烹調方面都好適合蒸、炒、炆煮嘅菜式，爽口好味又健康。

促進腸胃蠕動 金菇

金菇無論喺家常菜定火鍋都係常見嘅配料，擁有豐富嘅膳食纖維，唔易被胃酸破壞，可以促進腸胃蠕動，幫助排便，對腸道健康好好㗎。另外金菇內嘅「蘑菇殼聚醣」喺腸道中，可帶走多餘嘅脂肪並排出體外，有助於血脂控制。

提升免疫力 姬松茸

姬松茸，原產於巴西，又名巴西蘑菇。姬松茸有「蘑菇之首」嘅美名，近年因人工栽培成功而成為大眾化食用菌。佢嘅食用價值非常高，蛋白質多醣類為一般蘑菇嘅兩倍，有助提升免疫力，仲有對抗三高、降低膽固醇、血脂、血糖，改善消化系統等多種功效。姬松茸肉質有彈性，香氣十足，最適合用嚟煲湯飲！

清熱解煩 牛肝菌

屬於牛肝菌科(Boletaceae)嘅一種牛肝菌菇類。牛肝菌一般肥大肉厚，有唔同顏色，菌柄較粗或呈球狀，味道好濃郁，就算經乾製同烹煮後亦能保持香氣，係一種好受歡迎嘅食材。佢更具有清熱解煩、養血和中、追風散寒、舒筋和血、補虛提神等功效，最主要仲可以預防感冒、增強抵抗力同排毒等。

抑制腫瘤 羊肚菌

由於培植同採收都唔容易，野生羊肚菌係一種較昂貴嘅真菌類，上部呈蜂巢似嘅褶皺網狀，柔軟而有彈性，同其他食材一同烹調時，會吸收晒醬汁同其他食材嘅香氣，難怪咁受歡迎啦。而羊肚菌含抑制腫瘤嘅多糖，抗菌、抗病毒嘅活性成分，具有增強機體免疫力、抗疲勞、抗病毒、抑制腫瘤等諸多作用，而且對保肺、同氣管都好有幫助。

留意嚟緊逢星期三推出嘅《OHealth!》食用真菌篇，將會有簡易食譜分享、食用真菌專門店店主同大家分享５大貼士，亦會繼續有歪歪帶大家周圍搵食！

文：Yanica
編：Kar

【OHealth!】 食用真菌篇

輕鬆食譜跟住整  迷你蘑菇漢堡 （奶素/純素）   (傳送門按此)
5大貼士！野生食用菌店主教路 野生菌唔可以用水洗？ (傳送門按此)
8大推介 真菌餐廳集合 中西日式都有  (傳送門按此)
歪歪實試！尖沙咀松露主題餐廳 邊道菜式最濃味？ (傳送門按此)
歪歪實試！尖沙咀新派中菜 大推松茸羊肚菌海膽燴飯 (傳送門按此)
營養師拆解坊間菇菌類零食 標榜全天然/營養豐富 就真係健康？ (傳送門按此)