假期雖然完咗，但仲有無數嘅春茗、飯聚要出席！開飯仔有著數推介，呢間韓燒店最近推出$99任食五花肉優惠，好吸引！

新出優惠包括任燒任食五花肉、爐邊蛋、生菜以及4款韓式前菜，限時90分鐘。

主角五花肉來自歐洲，每塊都好厚身，肥瘦平均。上面仲有少許鹽、黑椒、辣椒，燒烤時就更香、更濃郁。

廚師教路，五花肉較為厚身，所以燒烤時唔使成日翻面，每一邊燒約3-4分鐘先翻面，就唔會將五花肉燒到好乾身，變得「柴皮」喇！

燒好後用剪刀剪開細細件，食得！

一咬五花肉，油香感立即喺口腔爆發，好勁。而且豬皮有嚼頭得嚟又夠juicy，正呀！

每人仲會跟送3款醬汁，有（前至後）辣醬、麻油鹽及酸汁。推介麻油鹽，加強五花肉嘅味道，好夾！

用生菜包住五花肉一齊食，食落無咁油膩又fresh啲！

每次見到爐邊蛋就不停食食食，有得任添就最讚喇！爐邊蛋仲連埋少少泡菜，食落更惹味。

前菜就有泡菜、沙律、醃海帶及醃青瓜4款，款式會不時轉換。酸酸辣辣嘅味道都幾醒胃，用嚟做餐前小食都不俗。

如果嫌齋食五花肉有啲悶，可以單點一份店子皇牌護心肉，護心肉即係豬隻心臟旁邊嘅部位，一隻豬只有200g，韓國人深信護心肉不含飽和脂肪酸，食咗肌肉會強健，值得一試！價錢為$138/180g。

護心肉肉質較為軟腍，有啲似牛柳嘅感覺，口感好juicy。

鍾意食牛嘅話可選特級霜降牛肉，油花平均，牛味又濃啲，價錢係$198/150g。

優惠包1杯無酒精飲品，除咗有各款汽水、柚子茶選擇，仲有一系列果醋飲品，有石榴果醋、青金桔果醋、西柚果醋、青葡萄果醋及桑莓果醋。左為藍天檸檬汽水，右為石榴果醋。

只要向店員出示餐廳Facebook嘅優惠post，就可以享用優惠。不過要注意，優惠只限旺角店，而且須事先預約。

$99任食五花肉優惠
供應時間：逢星期一至四全日供應，公眾假期除外
價錢：$99/位，另設加一

新麻蒲 BBQ
地址: 旺角彌敦道636號銀行中心1樓8-9號舖

文：Joy