好多人對甜品或者糖水嘅印象就係甜同唔健康，但其實香港而家已經有唔少主打健康嘅甜品店，多數都係低糖、純素或者選材較謹慎～今期搵咗4間介紹畀大家，有中式有西式，就算甜都可以甜得健康！
目錄
真材實料生磨糖水 研香
圖: pigfoodiexhk
疫情期間開設嘅糖水店，由團購開始做起，因為太受歡迎老闆就決定開實體店喇！好多時食糖水都會遇到加多啲糖去掩蓋唔足料嘅問題，不過喺呢度食就唔怕喇，店內嘅糖水都非常真材實料，如招牌8小時慢煮芝麻糊，選用日本金芝麻再配搭黑白芝麻磨成，特別有層次，微微嘅甜令芝麻香更突出。另外佢每種糖水都使用全天然果仁製作，如開心果露選用意大利西西里島嘅開心果，開心果香同甜味都好自然。
健康椰皇系列 金滿堂甜品
圖: iamanman
一直秉持「甜得健康」信念，使用香葉熬製而成嘅冰糖代替砂糖，大大降低糖水甜度又不失濃郁風味，同時增添清熱滋潤嘅功效，而且所有糖水都選用最新鮮嘅食材。推介椰皇系列，椰皇燉湯丸超級重椰香，燉蛋白嘅口感好似布甸咁軟滑，清心丸口感就煙煙韌韌，成個甜品都好滋潤呀。鍾意榴槤嘅朋友要試埋榴槤女王，椰子嘅清香加上嫩滑蛋白及少少榴槤，三種味道都好夾。
真希臘乳酪小店 小滿定律
圖: Kan Lee
西貢主打希臘乳酪嘅小店，好多時坊間嘅都係「希臘式」乳酪，真正嘅Frozen Greek Yogurt高蛋白質以及低糖低脂，健康好多㗎！乳酪可自選筒或杯裝，跟一款或三款配料及醬汁，配料都唔係成日見到嘅曲奇脆脆同朱古力，而係自家製嘅綠茶糯米糍同咖啡蒟蒻等，仲有其他烘焙店供應嘅曲奇、焦糖核桃同蝴蝶酥等～如果唔想太甜，醬汁都有熱情果汁同紅桑莓汁揀！
純素甜品 Moono
圖: 通常整Vegan甜品嘅難度都在於要喺質感上做到同正常甜品相似，呢間小店嘅老闆花咗唔少心思同時間去研究呢點㗎，以素食甜品嚟講幾出色～好似呢款純素馬卡龍，經過改良後口感同一般分別唔大，而且甜度更低，食落更舒服。玄米茶青提子卷蛋都推薦，玄米茶忌廉同蛋糕嘅部份都係微甜，茶味突岀，加埋青提子令卷蛋多一份清新嘅感覺！
文: Yanica
