香港人鍾意日本菜嘅程度毋庸置疑，各大派系嘅拉麵都會喺香港搵到，開飯仔今次就精選其中六間喺網上拉麵關注組得到唔少好評嘅特色拉麵店，睇下你試齊晒未？
 

特製背脂煮干拉麵　丸目背脂煮干

特製背脂煮干拉麵、特製背脂煮干沾麵（圖: SandyWon）

一個字：肥！事關旺角呢間東京過江龍主打「燕三条系」拉麵，呢個派系源自新潟縣燕市同三条市，由於當地非常寒冷，拉麵會加上豬背脂油保溫。呢度嘅特製背脂煮干拉麵就正正用上大量豚骨、豬背脂、沙丁魚乾熬煮嘅湯底，更可以按喜好再加雙倍甚至四倍背脂，但建議第一次試「標準」就好啦。
 

特製鮮蛤海鮮豬骨拉麵　大丸ラーメン

貝丸：特製鮮蛤海鮮豬骨拉麵、黑丸：醬油豬骨拉麵（圖: delishcindy）

由嚟自日本關西嘅村上先生主理，而且小店係全吧枱座位，感覺真係好似去咗日本拉麵店咁。食物標榜無味精，最多人試嘅係期間限定嘅貝丸：特製鮮蛤海鮮豬骨拉麵，可以揀醬油味、鹽味或蝦味，鹽味相對清啲，蝦味無論鹹味同海鮮香都係最重。豚骨湯底濃郁而唔膩，同新鮮大粒嘅蜆肉好夾。
 

芫荽湯素食拉麵　Maki拉麵

素食拉麵（圖: 痴線仔嬌妻）、赤：櫻花蝦辛辣拉麵（圖: rick chui）

店主兼廚師Maki喺日本拜師學藝四年後，回港開設主打九州風格豚骨湯同雞骨湯嘅拉麵。不過最特別嘅就要數到用芫荽汁加上蘋果、蘿蔔、昆布等熬煮湯底嘅素食拉麵！芫荽湯底味道清香，加上顏色繽紛嘅蔬菜配料，無論係芫荽黨黨員或要跑素嘅朋友都會食得過癮。櫻花蝦辛辣拉麵嘅即炸櫻花蝦天婦羅亦好加分。
 

雞白湯拉麵　泓一拉麵

雞白湯拉麵（圖: eat4forever）、特製醬油拉麵（圖: ahsufufu）

講到香港嘅雞白湯拉麵，除咗港島區嘅名店，另一推介就係呢間位於紅磡嘅小店，從店內自設製麵機堅持自家製新鮮麵條就知有誠意。雞白湯用雞殼、雞骨等熬煮八小時，雞香濃郁溫潤。慢煮叉燒同雞肉叉燒都肉質嫩滑。特製醬油拉麵同特製鹽味拉麵就清啲，可以食到麵條嘅小麥香！
 

魚介拉麵　樸一拉麵

魚介拉麵（圖: hooooooooooooooo）、海老拉麵（圖: lastbitematters）

前幾年開始興起魚介系，廣義嚟講即係用魚、貝等海鮮熬煮湯底，而旺角呢間小店嘅魚介湯底就用咗唔同魚乾、魚粉，味道鮮甜得嚟有層次。另一款海老拉麵嘅湯底係用豚骨湯底加上甜蝦油、蝦膏等製作而成，加上大量櫻花蝦，蝦味濃郁得嚟唔會過鹹。而且呢度嘅拉麵可以自選麵條（博多白幼麵/東京黃麵）同叉燒（慢煮/厚燒）啊。
 

烏賊濃味拉麵　奇蹟拉麵（已結業）

烏賊濃味拉麵、清湯醬油拉麵（圖: Tiffanynyt）

雖然位於交通唔太方便嘅屯門虹橋，但呢間小店依然長期都有排隊人龍。比較特別嘅係烏賊濃味拉麵，湯頭睇落幾黑，其實食落係淡淡墨汁鮮味，唔會太膩。最受歡迎嘅係清湯醬油拉麵，湯底清澈鮮甜，更被組員譽為係「港一醬油湯底」。而且用日本小麥粉製作嘅麵條爽滑掛湯，慢煮叉燒亦夠嫩滑。
 

文: Cathy.H