唔少熟食中心都開喺街市或者市政大廈上面，不過亦有例外嘅，例如火炭港鐵站附近呢個山尾街熟食市場就係買少見少嘅街邊大牌檔！雖然都係要坐摺櫈，不過有遮有擋，部分牌檔仲有埋冷氣𠻹。咁就無論任何天氣，都可以嚟嘆沙田乳鴿同招牌雞粥啦！
生滾雞粥 泰源大排檔
圖：A5和兔子
聽聞呢間係中大同學仔嘅其中一間宵夜飯堂，必食生滾沙田雞粥，熱辣辣軟綿綿之餘，雞肉夠滑又唔死鹹，覺得粥唔太夠味嘅朋友仔就可以落少少胡椒粉吊味。其他宵夜推介仲有惹味香口嘅椒鹽豆腐、皮脆肉滑嘅油浸龍脷魚、酸酸甜甜嘅京都骨等。懶得諗嘅話可以叫佢地嘅3-4人餐，但如果有唔鐘意嘅又可以改其他餸，呢啲咪係小店有彈性嘅好處囉。
沙田乳鴿 津津食家
另一間熱門就要數到呢間超過三十年歷史嘅牌檔喇，佢地嘅金牌乳鴿出名皮脆肉嫩，而且鴿肉用秘方醬汁滷過，唔洗點淮鹽都夠哂味，所以幾乎係每枱必點嘅招牌菜。脆皮炸大腸炸得好夠脆夠乾身，點埋山楂汁食落就無咁膩。脆皮炸豆腐同樣食得出功架，炸皮香脆豆腐嫩滑。最後一提佢地都有雞粥食，夠軟綿不過就比較似鹹雞粥，想食邊間就睇你口味喇。
酥炸豬扒 石器時代
圖：文迪
上面兩間牌檔夜市都相當旺場，相反呢間就只做早市到茶市，唔開晚市㗎留意返。而佢地最出名嘅就係豬扒沙律餐，即炸豬扒熱辣辣，食落香口鬆化。而沙律就有生菜、青瓜、粟米等，另附碎蛋沙律同千島醬，想撈埋一齊食得，On diet想食少啲醬又得，得咗。想食飽啲仲有雜扒飯或者紅酒牛肋肉飯等選擇，飯仲可以轉埋菜飯，係抵讃嘅。
更多【熟食中心尋寶】： |
農家雞飯 老香港食家
Lunch Time嚟開飯仲可以嚟呢間牌檔，最多人食嘅係佢地用木桶裝嘅農家雞套餐，雞有得揀白切、蔥油、香辣等口味，配嘅白飯又可以轉其他粉麵，再送埋餐湯同飲品。唔知係咪因為佢地用嘅農家雞，雞肉唔太肥又比較實。另外仲有各款碟頭飯、撈麵同沙律餐。而晚市嚟就可以食小菜，例如農家蔥油雞、椒鹽鮮魷、黃金海中蝦等。
任食雞煲 彩湖雞煲烤魚大排檔
比起其他檔口，呢間算係新開，不過靠住任食一樣可以打響名堂。兩小時任食按人數可以揀食重慶雞煲加重慶烤魚，辣度亦由唔辣到大辣都有選擇。而任食嘅火鍋配料就擺哂喺推門凍櫃入面，選擇唔算非常多，但基本嘅肥牛、丸類同菜都有。而午市就同其他牌檔差唔多，有炒粉麵飯、每日小炒同雲南米線等。
文：Cathy