$48就可以食到日本A5和牛？尖沙咀有間開業冇耐嘅火鍋店，有成16款由日本牧場直營嘅A5黑毛和牛部位選擇，軟韌濃淡都有，而且價位唔算高，牛魔王聽到都要變心心眼嘞。

和牛分別嚟自岩手縣同熊本縣，牛匠岩手牛年產量只有1000隻，數量之罕唔係好多地方食到。肉味較濃郁，脂肪熔點低，日常飼料更加入威士忌粕，令到和牛油脂有更濃郁嘅香味；而熊本和王牛嘅肉質相對軟嫩，油花均勻，入口溶化。

 熊本三筋肉

 熊本封門柳

如果比較喜歡柔軟口感嘅朋友，熊本三筋肉、熊本封門柳等部位就最啱，三筋肉係肩胛骨內側嘅稀少部位，味道濃郁，柔軟爽脆；封門柳口感軟嫩，帶有肉香。而全場最平 $48嘅岩手千本筋肉質亦係非常柔軟，重有豐富膠質𠻹。

 岩手內腿肉

 岩手後腰肉

至於喜歡少少嚼口嘅呢，推介可揀岩手內腿肉同岩手後腰肉，前者脂肪量少，口感帶彈性，不過味道就相對淡身少少；後者油花適中 ，帶有嚼勁。

講到油花，就非試熊本沙巴當同熊本西冷不可，沙巴當係肩胛接近肋骨嘅部位，既有油脂香，亦有濃厚肉味；西冷就唔使多講啦，油脂豐富。

除咗牛肉之外，當然都有豬肉、雞肉啦，餐廳亦同時供應多款新鮮海鮮，包括鮑魚、日本帆立貝、日本廣島生蠔等，青鯛魚更可作刺身同火鍋兩食呢。

而湯底方面則有10款選擇，款款都落足料熬製。其中，鮮甜嘅招牌花膠響螺雞金鍋，更可飲完先打邊爐；黑松露野菌鍋一滾起就香氣撲鼻，味道濃郁。

另外，特別推介一下拖羅蓉岩手和牛他他‧日本蛋黃，啖啖爽滑鮮甜，混和蛋香再夾埋脆脆紫菜一齊食，口感層次豐富，值得一試。

火鍋郎
地址: 尖沙咀堪富利士道6-6A號爵寓1樓

文：Kar