西方有炸魚薯條配啤酒，而尖沙咀呢間新開嘅小食店就諗到用大家細細個就食開嘅咕咾肉，沿用30年住家配方，但將佢搖身一變成為最新嘅街頭炸物小食。仲可以配埋店主自家製涼茶啤，本土風味都可以好Chill！
 

咕咾店名一睇，大家可能都已經係估到主打咕咾肉。原來係店主Franki細細個唔太鍾意食肉，爸爸就不計勞苦鑽研同改良咕咾肉，所以新店由炸漿到醬汁都係承傳爸爸嘅30年住家秘方！餐廳裝修擺設都好有懷舊感，好似呢個餐廳Logo咁，其實係豬仔錢罌呀！
 

酥炸咕咾肉（梅頭肉）（$38）

為咗畀大家更多選擇，咕咾肉有三款唔同部位，爸爸食譜用嘅係豬腩肉，但因為豬腩肉比較肥，第一次嚟可以先試半肥瘦嘅梅頭肉，即係豬嘅背脊前方到肩胛骨，食落Juicy軟腍。最特別嘅係炸皮非常酥脆，香口得嚟唔會太油膩。另外仲有豬爽肉選擇，口感爽滑同樣值得一試。
 

招牌菠蘿咕咾醬（隨咕咾肉免費供應，加購$10）

咕咾肉另一重點當然就係個咕咾醬啦，店家自家製嘅菠蘿咕咾醬味道酸酸甜甜，仲帶少少鹹味，的確配炸物一流。而肉同醬汁分開上，原來都係Franki爸爸嘅構思！咁樣可以令咕咾肉Keep住香脆，變成小食後就更加有中菜西食嘅感覺。醬汁仲有另外四款選擇：蕃茄牛油果、金莎蛋黃、皮蛋紅薑，同他他醬，想中式啲定西式啲自己揀。
 

虎咬膳良豬（$48）

除咗小食之外，Franki仲想將咕咾肉變出更多可能性，所以就諗到整刈包，再延伸就有呢個用Omnipork新豬肉嚟整素食版本！Omnipork係純植物，店主同廚師都研究咗好耐，最後得出呢個加咗甘筍同薯仔粒、用人手打成嘅「膳良豬扒」喇。用吉列方式炸過後，加青瓜、蕃茄同泡菜沙律醬夾喺包裡面，味道豐富，而肉扒咬落的確唔似全素，做到肉香同肉汁效果。
 

煙肉芝士條（$28）

呢度亦供應小食同甜品，例如呢款煙肉芝士條就係人氣炸物之一，外面炸至金黃香脆，裡面有煙肉包住芝士條。雖然芝士切開就無牽絲效果，但芝士味道濃郁，同鹹中帶脂香嘅煙肉好夾。
 

 

洛神花·啤（$28）

有哂白色泡沫同氣泡，但其實係小朋友都飲得嘅無酒精涼茶啤！自家熬製涼茶注入氣泡，上面再加蜂蜜味道嘅泡沫，甜甜地又有氣泡感，比普通涼茶都更易入口。而推出涼茶啤原來都係Franki嘅主要，因為要試唔同炸物，覺得熱氣嘅時候就去飲涼茶。之後聯想到炸物配嘅啤酒有鬼佬涼茶之稱，不如佢地就調返轉，用涼茶嚟扮啤酒！
 

涼茶啤仲有夏枯草同竹蔗茅根兩款選擇，各有唔同功效，例如夏枯草有助清火明目，洛神花健胃消滯，而竹蔗茅根就可以生津止渴。當然如果你想飲真正啤酒嘅話，呢度亦有一系列唔同地方嘅啤酒供應返。
 

咕咾 Goolo
地址：尖沙咀柯士甸路15號金巴利大廈B座地下C舖

文、相、片：Cathy