和牛迷想食正宗壽喜燒，而家唔使飛鄉下都有得食喇～壽喜燒名店日山自1928 年於東京成立，仲連續九年獲得米芝蓮一星級榮耀，最近日山正式進駐尖沙咀，食材均空運到港，希望帶到最傳統正宗嘅日式壽喜燒體驗畀食客。

裝潢以傳統日式大宅為設計靈感，有一條以石頭舖成嘅竹徑小路，另一面更坐擁維港景色，邊嘆和牛又有靚景睇，好chill啊～

餐廳主要供應壽喜燒及涮涮鍋套餐，講到明壽喜燒名店又點可以唔食壽喜燒呢～分別供應$488、$688及$988三個價位嘅壽喜燒套餐，當中以$688嘅「日山．竹」套餐最為抵食，包括前菜、沙律、壽司、溫野菜、野菜盛、A5 黑毛和牛西冷兩片、飯或烏冬及甜品，而且仲有由日本嚟嘅員工親自為食客烹煮。

前菜和牛筋煮凍，以和牛清湯凝固成膠凍，配埋爽口嫩滑嘅和牛牛筋，口感似啫喱，有和牛脂香。而薄燒和牛卷同樣油脂豐富，食埋個大蝦沙律仲開胃添～

A5黑毛和牛壽司三點盛，加上海膽及三文魚子更鮮味，而灸燒過嘅和牛嘅香氣更突出。

到主角壽喜燒！先用牛脂起鍋，放入野菜如日本大蔥、洋蔥、冬菇及豆腐煎香，再依次加入壽喜燒醬汁及水調味，壽喜燒湯汁由「日山」 東京廚師親自熬製完成再空運來港，入口濃郁，甜味恰到好處。

之後就可以放入重點A5 黑毛和牛西冷啦！和牛花紋有如大理石，油花好靚，吸收晒壽喜燒醬汁，第一片要點日本生蛋連大蔥食，和牛入口即溶，油脂爆發。而第二片就會連埋其他蔬菜盛於小碗中享用，所有材料都吸收晒醬汁，送飯食一流！

如果口味較清淡嘅開飯仔們，可以選擇涮涮鍋套餐。不同之處只在於湯底，由壽喜燒醬汁換成昆布木魚湯，有兩款醬汁分別係日山芝麻醬及酸汁，點肉食又係另一番滋味！

日山

地址: 尖沙咀廣東道3-27號海港城海運大廈3樓OTE302號舖

文、相、片: Yanica