深受拉麵控朋友愛戴嘅呢間跑馬地拉麵店，佢哋最出名就係打到好似cappuccino咁起泡嘅雞白湯底拉麵。而佢哋最近，就推出咗個2、3月嘅限定拉麵——北海道海膽拉麵呀！

同樣都係用清雞白湯底，熱辣辣上枱，即刻試啖湯底，就會飲到好鮮甜香濃嘅海膽味中，同時滲透住雞湯嘅甜。

麵條軟硬粗幼度都適中，掛湯力高，一放入湯底，眨下眼就已經索晒湯，變晒海膽橙色喇。

至於主角，當然就係北海道海膽啦。師傅挖空咗蛋黃之後，就將海膽放入去隻蛋度，扮返溏心蛋咁嘅造型都幾精緻。海膽仲用火槍輕輕燒一燒過，又甜又香口，加埋山椒葉嘅味道就更加豐富嘞。

不過，想食到呢碗拉麵都唔容易呀，事關每日只係限量做10碗，午巿、晚巿各5碗，而且只係做到3月底咋。

另外，舖頭亦有引入Minoh一系列嘅日本手工啤酒，呢個牌子喺香港比較少地方可以飲到，但喺日本，拎過唔少獎㗎。其中唔好睇隻Stout黑麻麻就覺得佢好苦，佢嘅烘烤麥芽味香之餘，焦糖同咖啡味都幾香。而W-IPA，就係double IPA嚟嘅，飲落頭一啖幾甜，點知餘韻嘅甘味更突出，下次嚟開食拉麵嘅時候，可以啤啤佢呀。

座銀（只限跑馬地店）
地址：跑馬地景光街13號地下A舖

文、相：Kar