九十二年，真係一段好長嘅時間，重遊舊地又係咪一定面目全非？踏入「蓮香茶室」，時間好似停留喺舊香港一樣，點心姐姐推住點心車，食客拎住枱單圍住熱騰騰點心揀嘢食；茶室角落有煲緊水嘅大茶壺，水滾自然茶靚，熟客會自行拎大茶壺幫自己加水，仲會貼心問埋同枱陌生人：「你使唔使加水呀？」。呢度除咗食舊式靚點心，最重要係人情味。
「蓮香茶室」保留昔日味道。
每當新鮮點心出爐，食客都會快手揀嘢食。
伙記齊心 保留「蓮香樓」情懷
人情味，講得直接啲就係感情。「蓮香茶室」前身正正係有92年歷史嘅「蓮香樓」。上個月底，「蓮香樓」老闆決定暫時休業，而一班舊伙記就接手重開。宣傳部林先生坦言：「當知道休業消息時，一班伙記喺好短時間就決定同老闆商討想繼續營運，於是改名為『蓮香茶室』延續情懷，直至呢度真係需要清拆為止。」
換上新招牌，繼續為茶客沖靚茶、整點心。
凌晨開始 手製點心
好多餐廳轉手後會轉新裝潢、加新元素，但「蓮香茶室」並無咁做，林先生就話：「啲客嚟呢度，就係鍾意呢度嘅文化，所以我哋會保留而家嘅模樣，同時繼續做好舊式點心。」咁其實舊式點心有咩特別之處？「好多舊式點心工序都好繁複，所以好難喺一般酒樓食到。好似豬潤燒賣咁，一定要每日新鮮即製先得。所以我哋嘅點心師傅每日凌晨3點幾就返嚟做點心，做到中午賣晒就算，唔會將點心留隔夜。」
點心師傅每日凌晨3點幾就開始做點心。
繼續嘆茶嘆點心
將呢度改名為「蓮香茶室」，亦因為一班老伙記想繼續做好靚茶同點心，「以前嘅『茶室』就係飲靚茶嘅地方，所以我哋決定用呢個名，希望盡量做好茶同點心先。除咗沿用一直以嚟嘅點心做法，茶葉都會繼續用同一供應商，好多熟客都鍾意飲我哋嘅茶㗎！」重開嘅茶室，招牌變但招牌菜不變，除咗取消晚巿外，原有嘅點心、粉麵都繼續供應。
食客絡澤不絕，一班熟客可以繼續日日嘆茶喇！
豬潤燒賣
講到舊式點心，一定要食經典豬潤燒賣。大大塊嘅豬潤厚度啱啱好，爽得嚟有咬口。先食一啖豬潤，再連埋下面嘅燒賣一齊食就最正。因為豬潤燒賣講究醃味同蒸煮時間，所以每日只能限量供應。
皮蛋酥
正宗傳統做法整嘅皮蛋酥，都好值得一試！外層酥皮相當香脆，入面係奶黃餡同皮蛋。皮蛋嘅酸薑味比預期更香更濃郁，而且仲係糖心皮蛋，非常有驚喜！
千層糕
坊間已經好難食到嘅千層糕，真係好考究手工同時間，因為師傅要用麵粉、奶粉、鹹蛋黃等材料逐層蒸熟，完成一層先可以再蒸下一層，令千層糕有層層分明同香滑嘅效果。
蛋散
平時食到嘅蛋散，好多都因為放涼咗而變硬變腍。呢度嘅蛋散好講究麵粉、雞蛋同砂糖嘅發酵時間，再憑老經驗控制油溫，令蛋散保持鬆化又唔油膩。
鵪鶉蛋燒賣
鵪鶉蛋燒賣可以話係茶客必點嘅經典點心，精髓就係將整件燒賣一次過入口，咬開爽彈鵪鶉蛋後，就會食到軟綿嘅豬肉燒賣，口感層次夠晒豐富。燒賣仲係用新鮮豬肉丶蝦同冬菇製成，特別鮮甜多汁。
粉包
不少年青一輩可能都未食過嘅傳統點心－粉包，而家已經唔多地方有得食喇！師傅先煮熟粉包餡料－豬肉丶豬肚、冬菇等，再用粉皮包好再蒸，饀料同口感比一般腸粉更豐富。
地址: 中環威靈頓街160-164號
文: Kate
相、片: Tom Li