【哈囉喂指南】萬聖節主題自助餐+搞鬼造型美食推介

Trick or Treat？即將嚟到一年一度嘅萬聖節，今年有唔少餐廳都推出主題自助餐或半自助餐，或者造型搞鬼嘅萬聖節甜品，準備同各位大細嘩鬼一齊慶祝！

萬聖節自助餐+半自助餐

萬聖節主題自助餐 cafe TOO

金鐘呢間酒店餐廳唔單止推出萬聖節主題嘅自助午餐同自助晚餐，更有一系列活動，最啱帶埋屋企嘅小嘩鬼去體驗！包括面部彩繪、扭氣球、Trick-or-Treat獵糖環節。當然玩完亦有一系列美食，同邪惡嘅萬聖節甜品幫手醫肚。

供應日期：2022年10月28至31日
供應時間：自助午餐12:00-15:00，自助晚餐10月29日17:30-19:30及20:00-22:00；10月30至31日18:30-22:00
價錢：請查閱酒店網站

嘩鬼同「樂」萬聖節海鮮自助晚餐 Park café

呢間位於尖沙咀嘅自助餐廳亦即將充滿節日氣氛，主題美食包括血腥肋骨（燒烤醬燒豬肋骨）、煉獄溶岩鍋（芝士火鍋）、鬼眼凶靈（豆腐慕絲）、自堀墳墓（意大利芝士蛋糕）等。客人亦可免費接受嘩鬼造型化妝，小朋友更有萬聖節小禮物啊！

供應日期：2022年10月29至31日
供應時間：18:30-21:30
價錢：10月29至30日成人$578/位、小童$398/位，10月31日成人$548/位、小童$388/位

Glow in the Dark半自助晚餐 BACI Trattoria · Bar

嚟到中環呢間意大利餐廳，就可以同時慶祝萬聖節兼食到今年亞太區50大薄餅大賽中獲得全港第2名嘅即製Pizza啦！皆因佢哋推出Glow in the Dark半自助晚餐，可以任食新鮮海鮮、凍肉拼盤、芝士、麵包、甜品，加上自選口味嘅Pizza，非常豐盛。

供應日期：2022年10月29日
價錢：$688/位，每位加配$198，可享兩小時無限量暢飲Prosecco氣泡酒、紅白餐酒、烈酒及瓶裝啤酒；每位加配$98，可享兩小時無限量暢飲果汁、汽水及雜果賓治

鬼馬萬聖節馬卡龍+嘩鬼巴斯克焦香芝士蛋糕 Amelia Hong Kong

尖沙咀呢間摩登歐陸餐廳就推出兩款萬聖節限定食物，首先係將人氣名物馬卡龍變身成為鬼馬萬聖節馬卡龍，三款搞鬼造型分別係伯爵茶朱古力、開心果同海鹽焦糖口味。而巴斯克焦香芝士蛋糕亦特別加上蛋糕插牌，節日氣氛豐富。

供應日期：即日起至2022年10月31日
價錢：鬼馬萬聖節馬卡龍$288/盒，嘩鬼巴斯克焦香芝士蛋糕$188/個

「尋魅萬聖」點心飲茶

哈囉喂主題美食唔係西餐嘅專利，中菜一樣可以好鬼馬，好似呢間位於中環嘅新派點心專門店，即將推出三款「尋魅萬聖」點心！眼球蝦餃造型非常逼真，蝙蝠雲吞其實係脆炸蝦肉雲吞配搭甜酸汁，木乃伊腸就係木乃伊造型嘅臘腸卷，打卡呃Like一流。

供應日期：2022年10月22至31日
價錢：眼球蝦餃、蝙蝠雲吞、木乃伊腸各$59

萬聖節曲奇+萬聖節翻糖 The Cakery

以健康優質生活為理念嘅本土烘焙店推出玩味十足嘅萬聖節曲奇，以色彩繽紛嘅有機翻糖作為裝飾，有齊女巫、蜘蛛、南瓜等經典元素，無論係大朋友定小朋友都會鍾意。另外亦可以自選杯子蛋糕，然後加購萬聖節翻糖，靈活度更高。

價錢：萬聖節曲奇禮盒$348，杯子蛋糕萬聖節翻糖+$28

萬聖節朱古力禮盒 Godiva Chocolatier

萬聖節玩Trick or Treat要講究，連糖果都要係哈囉喂主題先過癮！比利時朱古力品牌就推出兩款禮盒，一款係印上南瓜同黑貓嘅紫色鐵盒，裡面有G Cube松露黑朱古力同牛奶朱古力豆；另一款係俏皮嘅南瓜糖果罐，裡面係18粒共六款口味嘅G Cube松露朱古力。

價錢：萬聖節朱古力禮盒6顆裝$179，萬聖節朱古力南瓜形禮盒18顆裝$299

文: Cathy.H