和牛、海鮮、清酒，三款美食各有支持者，而山頂廣場新開嘅一間日本過江龍扒房，就將佢哋集於一身！7000平方呎嘅舖頭內，有用餐區、VIP區，仲有個清酒吧。牛扒主要嚟自日本、美國、韓國、比利時等多個國家，配埋自家調製醬汁，牛魔王最開心。

呢間餐廳本店喺日本六本木，嚟到香港，選擇比日本更多。牛魔王們要有定心理準備，選擇困難症可能隨時發作。呢度嘅和牛部位同產地有成15個choices，「牛」多眼亂啊。就以日山A5黑毛和牛為例，師傅特意揀咗三款口感好唔同嘅部位返嚟，分別係脂肪含量較低嘅Rump steak（臀肉）、半脂肪半肉地嘅肩胛肉，同埋油脂最重，最腍身嘅板腱肉。板腱肉嘅肉味仲好香濃添。

而坊間少見嘅比利時頂級牛扒則為廚師推介，經過15日熟成嘅乾式熟成西冷，肉味超香，輕輕用炭燒焦過嘅外層，帶有微脆口感，配埋以青椒、蒜頭等醃製一日嘅香辣燈籠椒汁，非常香口。

5款自家調製醬汁包括凍黑椒汁、香草醬、荷蘭汁、煙肉砵酒汁同香辣燈籠椒汁，各有特色。其中凍黑椒汁喺製作過程中仲加入咗油醋汁、sake、紅酒等，取其酒香同米香。而煙肉砵酒汁則以意大利煙肉、蔬菜同牛肉汁炒製，稠身啲，配啲肉味相對light少少嘅牛肉就perfect池。

就咁食牛扒難免有少少dry，叫返啲side dish伴下碟啦。特別推介黑松露薯蓉配慢煮雞蛋。呢道係本店嘅signature dish嚟，撈均隻蛋令到啖啖薯蓉變得香咗滑咗。

同時係海鮮控嘅朋友仔會加倍開心，事關呢度可以一次過食到三種唔同口味嘅生蠔，醬料係餐廳秘製，出面食唔到㗎。生蠔主要嚟自澳洲、西班牙，都係爽身型，海水味較重。生蠔三食中，以配木魚花啫喱同魚子醬一款最為特別，亦係最好食，多重口感，鹹香有幾種層次，好回味。另外另款分別係配微酸嘅油醋汁，同埋酸酸甜甜嘅羅望子汁。

地中海海鮮拼盤一個platter有成6款海鮮：亞拉斯加長腳蟹、日本黃鯺吞拿魚、波士頓龍蝦、澳洲青口、帶子同海蝦，款款新鮮。

最尾唔好唔記得留quota食甜品啊，呢度有款好特別嘅甜品要介紹返！開心果心太軟！講真，朱古力、抹茶味就食得多，開心果真心少見，未切開已經有粒粒開心果見到喺面喇，流漿嘅堅果味好重，好治癒啊。

37 Steakhouse & Bar HK
地址：山頂山頂道118號山頂廣場1樓102-103號舖

文、相、片：Kar