觀塘工廈當中有個優雅小花園？原來係呢間新開嘅Fusion餐廳，特別請花店幫佢哋設計乾花擺設，加上淺湖水綠主調同大玻璃窗，感覺悠閒又多打卡位。菜式就以日本同法國菜為主，主廚花咗唔少心思設計同改良，經典菜式油封鴨腿同法式多士都有驚喜。而且定價親民，希望以美食帶畀大家快樂！
 

Boon位於觀塘一座工廈當中，餐廳名意思係恩賜，幾位老闆都希望可以呢間餐廳能夠一個大家可以享受休閒、慢活嘅時光，同時開心分享美食嘅地方。其中一位老闆兼主廚有超過10年廚師經驗，跟過法國廚師學習，親自設計出一系列糅合經典同創新元素嘅日法Fusion菜式。
 

油封鴨腿伴紫菜薯蓉太陽蛋（$108）

油封鴨腿係經典法國菜之一，餐廳就特別改良為少鹹版本，更貼合香港人口味。用香料醃鴨腿再以半油封方式烹調，因此鴨皮香脆同時裡面肉質軟嫩唔會太乾，一絲絲鴨肉咬落肉味香濃。特別配搭紫菜薯蓉同太陽蛋，建議食法係用蛋黃加紫菜薯蓉再同鴨腿肉一齊食，中和返鹹度同油膩感，同時增加口感層次。
 

鰹魚熟成封門柳配紫菜薯蓉昆布牛油汁（$168）

特別選用封門柳，皆因呢個部位好似西冷咁有牛香，又有類似肉眼嘅軟腍口感，熟成後肉香更濃郁。而且邊位有少少焦香，裡面又保留到肉汁，配昆布牛油汁一齊食味道更上一層樓。薯蓉加入紫菜增加鮮味，配封門柳有加分效果。
 

虎蝦海膽醬意粉（$128）

橙色嘅醬汁用日本海膽製作，一上枱就聞到香味！鮮味突出之餘又好Creamy。虎蝦亦相當新鮮，肉質爽口彈牙。意粉煙韌，每一條都掛上海膽醬汁，啖啖都食到濃郁鮮味。
 

法式多士（$88）

法式多士就採用傳統方法，厚法包先用牛奶同雞蛋浸過夜再加法國純牛油即點即煎，繁忙時間隨時要等20-30分鐘，但絕對值得等！多士四邊香脆裡面濕軟，牛奶同蛋香相輔相成。加上鮮果減低膩度，可以自由配搭糖漿同鮮忌廉，前者香甜後者輕盈柔滑。
 

 

法式甜薄餅配意大利gelato（焦糖蘋果）（$98）

另一經典法式甜點Crêpes呢度都有得食，Crêpes配方經過改良，食落更煙韌又更香口，仲加入雲呢拿籽增添香氣。配意大利雲呢拿Gelato一暖一凍，口感刺激又香甜。配料有焦糖蘋果、士多啤梨同香蕉朱古力共三款口味，焦糖蘋果係餐廳自家製作，加咗少少白蘭地，味道層次豐富。
 

伯爵奶泡（$48）

伯爵茶Latte上面特別加咗手打奶泡，口感柔滑令Latte飲落更滑順。味道以伯爵茶獨特嘅佛手柑同紅茶香氣為主，甜度適中。
 

雜莓乳酪沙冰（$58）

選用新鮮水果取代糖漿去打沙冰，例如呢杯雜莓乳酪沙冰就用咗覆盆子、黑加侖子、黑莓，即點即打。飲嘅時候除咗有雜莓嘅酸甜清新味道，同時仲咬到少少果籽同沙冰嘅冰粒，啱晒鍾意有啲咬口嘅朋友呀。
 

Boon 
地址：觀塘駿業里10號業運工廈14樓G室

文：Cathy
相、片：Tom Li