由日本紅到嚟香港嘅班戟專門店，第三間香港分店終於開到去新界區啦！新店仲有限定口味：日本士多啤梨宇治抹茶煉奶班戟，宇治抹茶鮮忌廉上面係香甜日本士多啤梨同特製煉奶醬汁，啖啖和風滋味啊～
 

日本士多啤梨宇治抹茶煉奶班戟（$108）

幸福班戟沙田新店限定嘅就係呢份日本士多啤梨宇治抹茶煉奶班戟，原味梳乎厘班戟一貫蓬鬆微甜而充滿空氣感，上面係大量使用京都宇治高級抹茶製作嘅宇治抹茶鮮忌廉、一粒粒日本士多啤梨果肉，同特製練奶醬汁。
 

士多啤梨酸甜多汁，襯托出抹茶嘅幽香同回甘，加上少少練奶醬汁嘅甜味，味道層次豐富。不留意返因為日本士多啤梨供應期有限，所以係期間限定供應。
 

熱朱古力班戟配自家製穀麥（$88）

天氣轉涼，班戟都想食熱啲？呢款熱朱古力班戟配自家製穀麥就有暖笠笠嘅朱古力醬，香濃得嚟唔會太甜蓋過班戟本身嘅香味，加上牛奶味超香又柔滑嘅忌廉，自家製穀麥香脆又有咬口，食完一定夠滿足。
 

珍珠抹茶拿鐵（$68）

 尖沙咀同沙田外賣店限定嘅珍珠飲品系列，有奶茶、拿鐵、梳打唔同口味選擇，抹茶拿鐵飲落味道柔和，有茶香但略欠微甘。拿鐵順喉，珍珠煙韌有咬口。
 

裝修由日本室內設計師設計，以綠色、木等為主，感覺自然柔和。而且沙田比較多小朋友，所以同尖沙咀店一樣，特別請嚟日本人氣漫畫少女Lara做壁畫設計，最啱各位自拍打卡！
 

沙田店秉承用料嚴謹精神，採用自家合約農場嘅新鮮雞蛋、新鮮牛奶製作嘅發酵牛油、紐西蘭最高級麥蘆卡蜂蜜等等。亦一樣係即叫即製，所以班戟落單後要等大概20分鐘呀留意返。
 

外賣店使用紙盒同粟米造嘅可生物分解環保餐具

幸福班戟
地址：沙田沙田正街2-8號新城市廣場3期3樓A326號舖

文、相、片：Cathy