一聽到呢句「乜咁啱嘅」，就自然諗起陽光！今年陽光用「我的陽光年代」做主題大sell懷舊，今年3月曾經推出過復刻包裝檸檬茶、蜜瓜味荳奶同橙汁飲品，連當年經典嘅鄭伊健廣告亦重拍咗個致敬版本，雖然評價好壞參半，但始終勾起唔少人嘅童年回憶嘅！今日終於加推埋菊花茶、柑香茶同蘋果汁，六款齊晒腳！

其實檸檬茶包裝已經經歷過多次變遷，今次復刻咗80年代版本，舊logo三片檸檬加上綠黃色間條，最深入民心！第二代logo同「檸檬茶」字樣變咗手寫字體，成包換成黃色，感覺young啲。後來亦推出過茶餐廳系列，除咗「茶餐廳0茶」包裝，亦有更甘香嘅錫蘭0茶、低糖版本等唔同口味。

而家包裝換成電腦圖案，多咗句「茶檸絕配更啱你」。

菊花茶都係舊版靚啲。

藍色間條感覺好懷舊！

蘋果汁連包裝都變成長型，成個look唔同晒！

六款復刻飲品之中，有兩款飲品要特別留意。柑香茶亦曾經絕跡香港，要去到澳門先有得賣，直至舊年又再度上架。好多人都唔知！

柑香茶味道似橙汁crossover檸檬茶，甜咗啲。

原來橙汁曾經停售，今次再度推出市面，橙汁味道都幾清甜，係小時候嘅味道呀！可能過咗就唔再出返架喇，想飲就要把握機會，所有復刻版包裝期間限定至6月咋，儲返一套當做紀念都好吖！

而家陽光有個「我的陽光年代」照相館活動，喺商場設有AR自拍機，亦有八十年代雪糕電單車、2米高巨型檸檬茶同籃球場佈景版，免費任影，只係做到17號，快快去影返張懷舊相留念啦！

「我的陽光年代」照相館活動詳請

日期：2017年4月7至17日

地址：旺角亞皆老街8號朗豪坊7樓

開放時間：12:00nn-10:00pm

文：Perrins