相信各位粉絲都等咗好耐，幾個月前已經開放訂位嘅英國著名茶室Fortnum & Mason，終於正式開業喇。

兩層高，佔地7000平方呎，地下嗰層係茶品、餅乾、朱古力等特色產品嘅專門店，上層則係茶室，供應午餐、晚餐同下午茶，裝修高雅，坐擁維港景色，環境方面加咗唔少分。

餐牌選擇同英國大致相同，經典菜式必試蘇格蘭蛋配黑布丁及英式酸辣醬($208)，外層相當脆口，黑布丁口感柔軟。

英式傳統新地($118) 大大杯最啱sharing，輕輕烘焦過嘅半溶棉花糖，連埋士多啤梨雪糕一啖放入口，甜中帶酸，下層放滿新鮮士多啤梨同菠蘿，仲有自家品牌嘅士多啤梨果醬，感覺豐富。

下午茶時段更會有現場鋼琴演奏，三層架英式下午茶($588)由最底層嘅手指三文治食起，中間嗰層係鬆軟嘅鬆餅，有原味同果味，配凝脂奶油同自家品牌嘅草莓醬、檸檬酪；最後頂層則有5款精選甜品，全部嘢都可以無限添加啊！

 (左)南瓜意大利雲吞配松子仁及鼠尾草 $248、(右)蟹肉配蛋白、香菜及蛋黃 $218

 喬治國王布甸白蘭地醬（聖誕限定甜品）即將推出

 Royal Blend，配搭各款朱古力或朱古力曲奇時，更可有中和甜膩度嘅效果。

嚟得茶室，茶品當然係重點啦，逾百年歷史嘅招牌皇家紅茶（Royal Blend），以嚟自斯里蘭卡低海拔白毫嘅芽葉，同印度阿薩姆茶調配而成，口感順滑，味道濃郁仲有啲蜜糖甜香。伯爵夫人紅茶（Countess Grey）則係帶有柑橘清甜嘅earl grey版，同樣推介。

 Musea混合茶，適合配搭聖誕限定版曲奇或朱古力。

除咗各款招牌茶品之外，更有一款特地為新店獨家調配嘅新茶：Musea混合茶，呢款紅茶（black tea）混合咗雲南金芽、安徽祁門紅茶同紅花花瓣，口感清爽、甘涼，仲有少少辛口。

至於地下嘅專賣店，亦設有tea salon，每日都會有唔同嘅茶品畀大家品嚐。香港店更係全球第一家每日喺早上11點提供新鮮現烘餅乾嘅分店，三款口味包括燕麥、冰涼薄荷朱古力同雲呢嗱奶黃夾心餅乾，口感輕脆鬆軟。

舖頭內近千款產品中，唔係淨得茶葉或茶具㗎，仲有紅白酒啦威士忌啦等各款酒類、英式餅乾、朱古力、果醬等等，遲下仲有有個人化服務，可以喺指定嘅香檳或茶罐上加上個人化標籤，送禮一流。

FORTNUM & MASON
地址：尖沙咀梳士巴利道18號Victoria Dockside K11 Musea 地下002&122號舖

文：Kar
相、片：Tom Li