個個都話飛，個個都真係得閒飛咩？暫時去唔到日本嘅話，不如食住和牛燒肉先，銅鑼灣呢間樓上燒肉店主打日本和牛，打卡一流嘅大阪城和牛盛合有齊四款唔同和牛部位都係$298咋！亦有唔少創意和牛菜式，好似湯漬A4和牛薄片，即席灸燒和牛再浸落湯，和牛軟嫩又有碗熱湯暖下胃。
選用鹿兒島/宮崎和牛 新張期間有優惠
燒肉可以自由配搭自家燒肉汁、檸檬海鹽或辣味噌
燒肉の殿堂位於銅鑼灣港鐵站附近，選用嚟自日本鹿兒島同宮崎嘅和牛（及後有機會按時令轉換日本其他地區和牛），創作出唔同燒肉盛合同菜式。新張期間午市套餐都有75折優惠，晚市更會每枱隨機送出免費和牛單品同或甜品*！
打卡必點！高CP值大阪城和牛盛合
大阪城和牛4點盛合（$298）
用大阪城造型嘅三層盒奉上和牛，分別係頂層嘅和牛金塊磚、中間嘅和牛肋條、最底嘅和牛三角腩，另外一碟係特級厚牛舌，嘆齊四個部位嘅日本和牛都唔使$300！
和牛肋條
開飯仔印象最深刻嘅係和牛肋條，肉筋燒完變得香脆有嚼勁，越咬肉汁同牛味越多！雖然稍微韌一啲但絕對值得一食。同樣口感唔錯嘅係和牛金塊磚，切成長條形令邊位焦香、裡面肉質保持鮮嫩鬆軟。餐廳負責人表示金塊磚會挑選和牛中油花呈大理石紋、肥瘦適中嘅部位。
和牛三角腩
和牛三角腩就係脂香最突出嘅一款，和牛油脂入口即溶，口感滑嫩。而特級厚牛舌係取自牛舌中最為軟嫩嘅牛舌芯，厚切牛舌油脂豐厚，燒至半熟、外焦脆內爽嫩最好味。
創意食法～湯漬A4和牛薄片
殿堂湯漬A4和牛薄片（$88）
由店員即席用火槍灸燒A4牛三角薄片至理想熟度，再浸入主廚熬煮多時嘅大蜆昆布湯當中。餐廳負責人指靈感係嚟自踏入秋冬，想大家食燒肉同時有碗熱湯暖身，牛三角油花均稱，灸燒可以帶出油香。而浸湯嘅時候，和牛可以減少油膩感兼增加鮮甜味，同時和牛嘅精華就增添熱湯嘅油香！
蔥山薄牛舌（$78）
同樣選用牛舌芯，但呢款就選擇做薄切，輕輕一燒就變得粉嫩、口感脆彈！燒完捲上大量青蔥，蔥花嘅辛辣同清脆大大中和咗燒肉嘅油膩感，惹味得嚟又清爽。
更多【新店直擊】： |
更多創意和食推介
大蜆冷麵（$52）
牛油果軟殼蟹沙律（$72）
燒肉中途可以配冷麵或者沙律換下口味，呢款大蜆冷麵用Q彈嘅日本冷素麵配搭主廚以鰹魚、昆布、蜆等熬製嘅湯汁，冰涼解膩。加上大大隻嘅菲律賓大蜆，肉厚爽甜，鮮味加倍呀。沙律就推介牛油果軟殼蟹沙律，酥脆嘅炸軟殼蟹同Creamy嘅牛油果形成口感對比，加上特製醬汁都幾醒胃。
辣紅油脆脆雪糕（$28）
滿足嘅大餐最後當然係甜品，呢度嘅雲呢拿雪糕特別加上辣油同脆米。辣油唔算好多，微微麻辣口感可以帶出雪糕甜香，同時增加層次，呢個組合估唔到又幾夾。
燒肉の殿堂
地址：銅鑼灣駱克道459-461號The L. Square9樓
*午市75折及晚市隨機贈送單品為新張期間限定，優優惠期至餐廳另行通知為止，詳情請向餐廳職員查詢
文：Cathy.H
相、片：Yan Yan
