今次呢間新店終於唔係咖啡店而係茶室，主打一系列手沖茶同創意調茶。亦有供應主食同甜品畀大家配茶，大部分都係素食！環境優美寧靜，無論係想嚟放鬆飲杯茶，定係嚟食個Lunch或者Tea都一樣無問題。
 

植物學家（$68）

茶研位於中環，由兩位茶師同一位主廚主理。呢Set賣相吸引嘅調茶當中，玻璃杯嘅冰裡面有食用花，係將泡其他花茶飲品用過嘅花重用，例如玫瑰、菊花等，所以等冰慢慢融化嘅時候，花香亦會逐漸滲出。
 

玻璃壺裡面嘅冷泡茶，係用紅棗、龍眼、杞子、鳳凰單叢，即係一種帶梔子花香同蜜韻嘅烏龍茶浸泡。再配一小壺大吉嶺夏摘紅茶糖漿，飲嘅時候先將冷泡茶倒落有冰嘅玻璃杯裡面，再按口味加入糖漿，整體味道甘甜清爽。
 

普洱拿鐵（$58）

以坊間少見嘅普洱Latte配朱古力粉，Latte用有機豆奶沖調，口感較薄但茶香濃郁，有柔和嘅甜香同陳香。飲嘅時候建議可以好似飲Cappuccino一樣將嘴浸入杯中，一次過飲到朱古力粉嘅香甜同普洱Latte嘅茶香，提升甜度亦增加味道層次。
 

日本宇治薄茶（配和菓子）（$128）

餐廳亦希望大家可以以輕鬆嘅方法體驗日本茶道，呢杯薄茶係選用京都宇治四方の薫嘅茶道用抹茶，以茶筅攪拌茶湯，產生一層豐盈泡沫，令口感更綿滑。有非常明顯類似海苔嘅鮮味，甘味深邃而且唔會有澀味。另外會配一份和菓子，因為抹茶容易傷胃，所以日本茶道中係先單食和菓子再品茶，以口腔殘留嘅甜味帶出抹茶香。
 

 

抹茶味噌蕎麥麵（$98）

唔單止飲品以茶為主，食物亦以茶入饌。呢碗抹茶味噌蕎麥麵嘅湯底就以菜湯為主，加入抹茶同味噌，配搭蕎麥麵同普洱茶葉蛋、粟米、椎茸等配菜。湯底係蔬菜味道同味噌鹹香為主，最後帶少少茶甘，同蕎麥麵估唔到又幾夾。
 

自家製紅菜頭班戟（$78）

紅色嘅班戟係用紅菜頭、燕麥奶、豆奶同麵粉等材料製作，無任何雞蛋或牛奶成分，班戟口感比較柔軟。配搭乳酪、焦糖香蕉、椰子片同開心果碎，味道豐富。另附大吉嶺夏摘紅茶糖漿，建議大家可以先試原味，再按自己喜好加入糖漿。
 

Basque Cheesecake（$48）

今年大熱嘅巴斯克芝士蛋糕呢度都有得食，而且有伯爵茶、抹茶、焙茶三種茶口味，開飯仔揀咗最受歡迎嘅伯爵茶，裡面食到一粒粒茶葉粒，香濃茶味平衡芝士蛋糕嘅膩感，如果蛋糕中心口感再軟啲就更好喇。
 

茶研
地址：中環皇后大道中31號陸海通大廈1樓

文、相：Cathy