獅城名菜叻沙，雖然香港唔少餐廳都有供應，但要食到當地正宗風味嘅就真係唔多。金鐘新開嘅Rempah Noodles，由來自新加坡嘅Bobby親自主理，舖頭只賣三款新加坡麵食，叻沙、乾叻沙同蝦麵，夠晒專門！
舖頭以新加坡傳統黑白屋設計，加上開放式廚房，靚到似café！來港十幾年嘅店主兼大廚Bobby，本身唔係做開飲食業，不過自少愛吃愛煮，烹調方法都係參照兒時及當地食到嘅味道再自行研發。店名Rempah係馬拉文，解作香料膽，而娘惹菜嘅精髓就係每道菜會採用唔同嘅香料膽，所以店內食物都係以娘惹口味為主。
先講叻沙，香料膽係自己炒製，材料有乾葱、南薑、黃薑、香芽、石栗等7至8種唔同香料，再加上雞骨、豬骨熬成嘅湯底及椰漿，就成為叻沙湯底。娘惹風叻沙比一般杰身，質感有啲似醬汁，但食落就更加香濃。配上米線、豆腐卜、魚片、雞蛋同蝦肉，味道偏甜帶微辣，相當惹味。
娘惹濃厚叻沙 $98
乾叻沙係新加坡近年流行食法，當地人鍾意食叻沙但又怕熱，於是就有呢一款撈麵版叻沙。用同一個叻沙香料膽，但就煮到似gravy咁嘅濃度，撈埋香滑銀針粉，味道相對較淡，但口感好特別。
乾叻沙 $98
蝦麵湯底用炒香過嘅蝦頭、蝦殼等熬5 個鐘，再混合骨湯慢火熬製而成，味道超甜而且蝦香好濃，絕對會飲晒成碗湯！可配蛋麵、米粉或者參參（兩溝），配料有自家炆煮豬腩肉、蝦肉及嘅自家製豬油渣，好邪惡！
優質蝦麵 $98
如果唔夠辣，仲可以加少少自製參巴醬，以新鮮辣椒、蒜蓉製成，Bobby稱因湯底已有好多香料，所以辣醬味道做得簡單啲，就唔會影響到湯底味道。
店子不時有新加坡同鄉來幫襯，鍾意食叻沙及蝦麵嘅朋友，真係要試吓！
地址：灣仔軒尼詩道18號地舖
文、相、片：Perrins