尖沙咀戲曲中心繼傳統中菜館後，最近多咗一間懷舊港式茶室進駐。食物方面夠晒多元化，無論係港式車仔麵、中式吊燒雞、特色滷水同埋西式小食都有得你揀～

芫茜湯車仔麵

講到車仔麵，都可以話係香港代表食物之一。芫茜湯基底係用原隻雞熬製嘅雞湯，再加上濃郁自製芫茜醬，全個湯都係濃郁茜味啊～芫茜控唔可以走寶。唔知揀咩麵底嘅推薦呢款台灣百年老字號手造麵，質感有啲似平時食開嘅油麵，但就比較彈牙。

配料秘製原件花膠有成隻手掌咁大，充滿骨膠原。

芫茜控食完車仔麵唔夠喉，可以試埋呢個芫茜滑蛋煙三文魚三文治。

蝦兵蟹將海鮮湯車仔麵

呢個世界當然有好多開飯仔囡們係唔敢食芫茜嘅！唔駛怕，呢個蝦兵蟹將海鮮湯都係唔錯嘅選擇，用上三點蟹及基圍蝦熬製，惹味之餘仲帶有淡淡鮮甜。

配料包括入味溏心蛋、即炸響鈴及麻辣鴨血，即炸響鈴香脆，麻辣鴨血好有台灣風味。

傳統手吊燒雞

餐廳特別訂製一個高智能大型風櫃，經過風乾後，燒雞外皮更加香脆，但雞肉仍然保持嫩滑多汁。

汕頭陳師傅特色滷水

餐廳嘅滷水由潮菜大師陳澤嘉師傅親手主理，以大量中式香料精心熬製。包括專誠搜羅來自潮州嘅南薑、來自揭陽嘅頂級醬油、頂級桂皮、川椒、八角及蒜等。滷水包括鵝片、鵝肝、鵝腸、五花腩、豬大腸，味道唔會過鹹，但帶有濃濃香料味。

金牌滷水鵝片飯配首創鹹檸檬燉鵝湯、絲苗白飯、芽菜及鹹菜，配埋芽菜及酸菜食更加突顯鵝味。而台山興哥手工黃鱔煲仔飯用砂鍋上，味道特別香。

小食西班牙紅蝦多士及懷舊鬼馬雙星，紅蝦多士夠脆身，懷舊鬼馬雙星分別係鯪魚肉及墨魚膠，點埋沙律醬食好惹味。

遊園．茶記

地址: 尖沙咀柯士甸道西88號戲曲中心地下2-3號舖

文、相、片: Yanica