抹茶控呢排睇嚟都係冇得減肥住㗎喇，啟動自暴自棄mode啦（誤）。點解？因為除咗旺角有新嘅京都抹茶pop up店之外，又有超巿推出一系列新嘅京都宇治抹茶甜點呀，講到明係期間限定，即係又要去食啦（好似係）。

呢次嘅日本期間限定集合，主要以京都宇治抹茶甜點同札幌焦糖布甸為主，當中有啲仲係第一次喺香港有得賣嘅品牌嚟。

抹茶系

抹茶系方面，有抹茶撻啦、抹茶卷蛋、抹茶芝士蛋糕同抹茶糕。抹茶撻嘅餡用上北海道十勝鮮忌廉同白朱古力等材料，所以都幾甜下。而撻底就食得出加咗杏仁粉，有淡淡嘅堅果香。

抹茶糕就係全牛乳製造，係幾香奶味嘅，不過隻抹茶味都同時甜到一個點。

焦糖布甸系

焦糖布甸嚟講，平時都係食開原味嘅多，但今次就有成4款口味咁多呀，而且仲係用無添加嘅北海道鮮牛奶製作，香濃幼滑，係想試嘅。4款味包括：楓糖、南瓜、朱古力同濃厚芝士。有甜有甘，各有特色。開飯仔試咗其中兩隻味，南瓜嗰隻蛋香味濃得嚟，仲有絲絲南瓜蓉嘅口感，幾有驚喜；而濃厚芝士嗰隻就真係超濃厚，科科。建議喺雪櫃拎出嚟之後攤幾個字先食，會比較滑身啲。

而芝士迷仲有多樣嘢可以試，就係芝士梳乎厘蛋糕喇，底層係焦糖布甸，上層就係芝士梳乎厘，進化到兩種口感，唉說好的減肥呢？

city'super
期間限定：4月18日 - 5月7日

文、相：Kar