心心眼、笑到喊、仲有一嚿嚿便便......講緊你同我喺手機都成日用嘅emoji呀，今次emoji化身成為唔同創新中式點心、甜品同飲品，㜺鬼之餘仲特別有新意！
 

即日開始，喺中環同尖沙咀都有分店嘅点心代表會推出期間限定嘅emoji點心，例如呢籠「正呀喂燒賣」，上面三粒燒賣各自都有唔同emoji表情，而下面就係原粒加拿大帶子同豬肉蝦肉燒賣。
 

想再立體啲？呢碟「朱古力炸便便饅頭」就肯定係你嘅「飛佛」(Favourite)喇，手造饅頭造型似足便便emoji，炸過之後外脆內軟，朱古力味道唔太重，所以亦唔會過甜。甜魔可以連埋下面嘅煉奶同燒米餅一齊食。
 

講到新派點心，當然唔少得呢間最受歡迎嘅流沙包啦！「屎朱古力流沙包」每籠都會隨機兩款emoji，而入面係瑞士朱古力，再加混入少少鹹蛋黃，食落包身鬆軟流心又有朱古力香。最緊要嘅趁熱食，流心效果更加彭拜！
 

另外仲有呢籠「馬騮流沙包」，三個唔同表情嘅馬騮emoji令人會心微笑，入面其實係好立克奶黃餡，略嫌好立克甜香唔太明顯。
 

除咗中式點心，呢度亦有西式同創意點心，「好滾動鮮芒果布甸」上面個喊喊emoji下面其實係用日本3.6牛乳同新鮮芒果蓉整嘅芒果布甸，加埋泰國芒果肉，就算喊緊都要食咗先講！
 

「食上癮蛋撻」賣相更有玩味，港式蛋撻上面放咗笑到喊同舐舐脷emoji，而蛋撻更加入日本北海道3.6牛乳，即叫即整。
 

另外仲有「一間鐘情漢堡」、「女神豬扒煎蛋飯」同「講呢啲咖喱煎蛋糯米雞」等飽肚食物，滿足各位大胃王同澱粉控。
 

有嘢食亦要有嘢飲嘅，「嬲嬲豬桃味特飲」上面特別放咗個Pat Pat形嘅桃味奶凍，食起上嚟騰騰震都咪話唔好玩。
 

另外仲有「甜蜜蜜啤酒」同「金閃閃啤酒」，其實分別即係櫻花味同原味日本麒麟沙冰啤酒，特別在上面嘅泡沫都係用啤酒整嘅，唔單止味道特別，而且仲有效隔絕下面嘅啤酒同出面嘅空氣，飲落更爽歪歪。
 

成個emoji系列總共有十款點心、三款飯類、三款甜品同四款飲品，供應期至2017年7月份。
 

文、相、片：Cathy