熟成牛肉製作過程需時又繁複，平時出去食閒閒地都幾百蚊一份。尖沙咀最近就開咗間新熟成牛專門店，主打各種親民價熟成牛料理。牛魔王ready好出動未？

店內有自家熟成雪櫃，自行熟成各種牛肉、豚肉及鴨肉。負責人話因為牛肉有天然酵素，天然酵素會打破肌肉內嘅組織，所以喺熟成過程中會令肉質變得更嫩，肉味濃郁之餘肉汁會更豐富。

300日純燕麥飼養黑毛安格斯西冷扒 ($268)

熟成黑毛安格斯西冷扒肉脂味濃，肉質有彈性仲帶少少鮮甜味。

燒牛腰肉料理 ($138)

牛腰肉肉味同樣濃厚，質地上就較軟腍，可配芥末毛豆蓉及漬物食。套餐會附上餐湯及沙律，餐湯用豬骨及新鮮蕃茄熬製六小時而成，香濃杰身。

熟成豚肉七味燒 ($98)

唔食牛肉嘅朋友都可以試下熟成豚肉㗎，熟成豚肉比起普通豚肉較嫩滑軟腍，配上流心溫泉蛋同七味粉，一啖食落去真係好滿足！

不過熟成牛肉並唔係熟成得越耐就越好，有時熟成得太耐肉質可能會過乾，所以都係視乎返個人口味嚟選擇就啱。

另外餐廳內更可體驗自行手沖咖啡，供應專業器具，過程簡單易明，就算新手都可以沖到靚咖啡飲！

山翠熟成牛料理

地址: 尖沙咀河內道18號K11購物藝術館2樓201號舖

文、相、片: Yanica