坐喺海邊食海鮮歎啤酒，都唔一定係飛去外國先做到嘅。點樣可以留喺香港都有外國放假feel？去尖東啦~ 藝術館重開後，海濱長廊上新開咗一間露天餐廳，有多款海鮮同小食，仲有自家製特色雪糕同多款手工啤酒，夠晒chill！

呢間餐廳採用Grab'n'Go形式，落單後自行取餐，然後就可以隨便喺海旁或用餐區度享用，享受住暖和嘅日光，吹住海風，再望住個海，心情都輕鬆啲。

餐廳特別選用可持續性海鮮，食都食得夠環保。人多就就梗係嗌拼盤share最開心啦~ 海鮮拼盤好豐富，有澳洲生蠔又有以香草微煎過虎蝦，仲有青咖喱紐西蘭青口、天婦羅八爪魚丸等，啲海鮮全部都好鮮甜，八爪魚丸中仲堅係有大大粒八爪魚，外脆內爽！

另一個小食拼盤同樣吸引，特別要提下長條形嘅炸物，就咁睇係估唔到裡面賣咩藥，一切開，啊！有好多粒生蠔呀！原來係咖喱生蠔冬甩，好有驚喜。

附近嘅打工一族，lunch嚟食返碗七彩嘅八爪魚poke bowl刺身飯都係一個唔錯嘅選擇，鋪滿黃蘿蔔、紅心蘿蔔同大豆等，相當健康，加埋五香粉就更加香口。

搽上泡菜醬嘅自家製麵包，再夾住一嚿嚿龍蝦肉，呢個小龍蝦包相當有特色，龍蝦肉鮮爽中又帶有微辣，好開胃。

話明要chill梗係要有返杯酒啦~ 呢度有多個tap頭，供應本地品牌鬼佬手工啤酒，pale ale、ipa等各款口味都有，仲有鬼佬最新出嘅gin & tonic添~

最後整多杯雪糕就perfect池喇。每日輪流供應6款以澳洲牛奶自家製作嘅特別口味雪糕，杯裝又得，cone又得，口感軟滑，不過就溶得好快，要打卡嘅朋友就要快手喇。最受歡迎嘅係海鹽焦糖花生醬味，甜甜der仲有機會咬到粒粒花生添~ 紅桑子奶茶味則甜中帶酸。但最特別嘅一定係雲呢嗱八角味，八角味真心突出，辣辣地咁好過癮，如果撞啱你去嗰日有呢款味，記得試下。

 (左)白脫牛奶炸雞脾配茄子多穀飯、(右)天婦羅軟殼蟹配芝麻辣醬烏冬沙律

Ink
地址：尖沙咀梳士巴利道10號香港藝術館地下

文、相、片：Kar