煲仔飯都係香港人地道嘅comfort food，由最受歡迎嘅臘味煲仔飯，去到近年嘅新派配搭，每年冬天點都要食一餐半餐。天氣有排都未凍，但係坑口開咗間煲仔菜專門店，一年四季都有得食，仲有唔少新奇嘅新派口味！
餐廳供應懷舊同 fusion 煲仔飯款式，傳統嘅臘味、窩蛋牛肉，滑雞等款式固然喺餐牌上佔一席位；新派款式有估你唔到嘅抺茶櫻花蝦煲仔飯！用抺茶煲飯坊間比較少見，在飯粒間除咗見到染上淡淡嘅抺茶顏色，亦可以食到點點抺茶味。
懷舊臘味煲仔飯（＄88）- 臘腸、膶腸同臘肉均由店方直接向本地廠房訂製生曬，瘦肉肥膏比例七分瘦三分肥，口感平衡。
東瀛抺茶櫻花蝦鰻魚煲仔飯（＄78）- 鰻魚外層脆口魚肉軟熟，與櫻花蝦香脆口感；米飯以抺茶代替清水煲熟，飯粒充斥淡淡抺茶味道，入口不突兀。
海南雞煲仔飯（＄78）- 雞油飯以雞湯、香茅同斑蘭葉熬成，三黃雞肉質幾細嫩，配上煲仔飯焦，有平時雞飯嘅香氣，亦有煲仔飯粒粒分明嘅口感。
更多【飲食潮流】： |
除咗餸菜，米飯亦係煲仔飯主角。師傅表示米粒全部只用舊米，取其乾身柔韌，粒粒分明嘅口感，配上瓦煲更容易結起大塊飯焦。
除咗煲仔飯，佢哋亦有多款煲仔小菜，全部小菜煮嘅所有過程都係喺砂煲中進行，必吃馬來沙嗲火焰牛仔骨，侍應喺上菜時會事先點好火，成道菜食到尾聲仲係熱辣辣，而且迫出香氣，沙嗲香氣濃郁，牛仔骨食落幾惹味。另有煲仔麵、酸辣粉等，鍾意食熱辣辣煲仔菜有排試。
唔食煲仔菜，亦有小菜如脆皮豬手、肉醬意粉等，甜品亦有邪惡金沙西多士，菜式都幾多元化。
馬來沙嗲火焰牛仔骨（＄88）- 上菜時點火一刻十分吸引，牛仔骨喺砂煲上淋上馬來沙嗲醬，香氣濃郁。
脆皮豬手（＄138）- 豬手十分巨型，經過四小時慢煮嘅豬手再被油炸鎖住肉汁，一大班人啱食！
邪惡金沙西多士（＄38）- 每個麵包粒蘸好蛋黃後再炸至金黃色，配上朱古力榛子醬同煉奶，名副其實夠邪惡。
餐廳空間寬闊，以舊時七、八十年代大排檔為設計主題，水吧上有一列調味料櫃，放置不同二次創作嘅調味品，符合時下流行嘅復古氣息。
將軍澳重華路8號東港城1樓101號舖
文、相、片：Timothy