法國菜係浪漫嘅代表，不過又唔代表要去正宗貴族法國菜餐廳，食足13道菜加貴夾唔飽嘅。想同時嘆到法國菜浪漫情調同新鮮為主嘅美味，又想食得Casual少少兼食得抵啲，開飯仔幫大家揀咗以下七間人均消費$200樓下嘅法國菜館同甜品店，啱就Bookmark定，下次約女神就要識做喇。
荃灣90後水準法國菜 Stella's Bar & Restaurant
圖：ki918
點樣兼顧法國菜嘅精緻又唔會貴夾唔飽？呢間由90後老闆開設嘅法國菜餐廳或者答到你。裝修走工業風，加上吊燈夜晚特別有情調。松露汁溫泉蛋雜菌鮮香Juicy，番茄啫喱配意大利水牛芝士擺盤有心思，澳洲蟹肉意粉嘅彈牙意粉同鮮甜蟹肉非常夾。最後嗌多份伯爵茶奶凍或者飲返杯士多啤梨乳酪沙冰，畫上甜美句號。
灣仔街角法式小館 Odelice!
小館位於旺中帶靜嘅蘭杜街，環境舒適悠閒。細食嘅女士可以嗌鹹食Galettes法式蕎麥餅或者甜嘅Crêpes班戟，男士就可以先由Croque Monsieur，即係法式傳統火腿芝士三文治開始，同時亦有白酒忌廉汁青口配炸薯條、法式香煎蜜汁鴨腿、雜錦海鮮扁意粉等主菜選擇。值得一讃嘅係飲品選擇夠多，亦有Wine List畀大家學法國人做Wine Pairing！
西貢貼地南法大餐 流落民間
流落民間聽落好似有啲慘，但睇埋餐廳英文名Down to Earth就知道，其實餐廳店主只係想將形象高檔嘅法國菜變得平易近人。呢度主打南法菜，南部沿海地區以海產為主，呢度嘅海鮮菜式亦相當出色，香煎尖吻鱸配紅波椒汁嘅魚扒肉厚帶鮮香。另一推介焗脆皮法國傳統鹽醃油鴨肶咸香有致。
更多【二人前指南】： |
中環小店傳統Crêpes Insta Crepes
圖：JobieLee
喺中環Soho區都唔代表一定要食得好貴，呢間法式傳統Crêpes專門店舖仔細細，係就係無咁舒服，但坐Bar枱睇住街景又係另一種放鬆。Crêpes特別用法國麵粉即叫即整，The Basic包住芝士、雞蛋同火腿，簡單而滿足。Crepe Suzie裡面包住香橙果醬，食之前先加酒點火增加香味，不過酒味就會比較重。唔鐘意酒嘅亦有多款鹹甜口味選擇。
銅鑼灣法式鮮味漢堡 Big Fernand
講起漢堡可能唔少人都會諗起美式大大份啖啖肉嘅特色，而法式漢堡賣相大同小異，但就更著重食材嘅新鮮程度同醬汁嘅配搭。招牌Le Bartholome漢堡用澳洲牛肉扒配熱溶芝士、香脆煙肉、焦糖洋蔥等搭自家制醬汁，分量十足，肉扒Juicy而醬汁亦相當惹味。仲可以轉套餐食埋外脆內軟嘅炸薯條同French Lemonade，浪漫都可以食得飽肚嘅。
尖沙咀米芝蓮加持泡芙 Owl's Choux.Gelato.Coffee
呢間今年新晉米芝蓮街頭小食推介甜品店嘅老闆喺開飯餐廳專訪入面透露過法式泡芙相對輕身，配Gelato食都唔會覺得太甜膩。而且餐廳仲會推出嘅期間限定嘅雪糕泡芙口味，例如最近嘅Peanut Brother同Mango Bomber，前者有邪惡Peanut Butter Gelato，後者就玩爆炸糖！另外仲有忌廉泡芙，忌廉係即叫即唧，令泡芙皮Keep住香脆。
灣仔高CP值甜品 Passion by Gerard Dubois
呢間連鎖店嘅沙律同輕食都有唔錯嘅口碑，不過今次開飯仔特別要介紹一下佢地嘅法式甜品，同樣價錢相宜又有水準。焦糖燉蛋Crème brûlée係招牌之一，焦糖層輕脆香甜，下面嘅燉蛋亦非常嫩滑，食落仲會見到唔少雲呢嗱籽。另外仲有士多啤梨丹麥酥、雲呢嗱檸檬餅等糕點。夏天嚟嗌多杯Gelato，冬天嚟又可以飲返杯熱朱古力，得咗。
文：Cathy