壽司Omakase店愈開愈多，而呢兩位80後本土廚師仍然選擇疫情期間創業，皆因佢哋認為有質素嘅日本料理同Omakase都可以價錢親民，而且款式亦可以好特別！餐廳由Wing同KC兩位負責人兼任主廚，佢哋都去過日本學藝，多年來亦喺各式日本菜餐廳任職，但想再有突破，佢哋決定自己創業！
KC曾擔任高級Omakase店主廚
Wing曾赴日跟隨米芝蓮二星廚神學師
疫情下開餐廳，花嘅心力比平時多好多，講到點樣運用過往嘅經驗，Wing就提到：「我跟米芝蓮師傅學廚嘅時候喺佢身上學到執著，呢種精神亦幫助佢攞到米芝蓮。我知道日本人傳統文化係需要堅持一啲佢認為啱嘅嘢，可能係好少嘅分量，或者好少嘅配料已經令成件事唔同；所以舖頭嘅食材超過9成都來自日本，甚至糖同鹽都揀日本來貨，始終質素係好啲嘅。」。
晚市Omakase嘅刺身有機會食到海膽
餐廳晚市主打Omakase，而刺身款式除咗有魚類，重有大眾鍾意嘅貝類食材，例如海膽、真蠔、岩蠔等，款式則按時節轉換。店內所有海產都由日本嘅魚鮮市場直送到港，品質已經有保證，但KC強調入貨會考慮產地外，更注重食用範圍夠唔夠飽滿，兩者因素缺一不可，可見佢哋對製作同選料真係好有要求。
煙燻鯖魚係晚市Omakase和食之一
呢度可以試到江戶前嘅菜式外，亦有新派料理，而煙燻鯖魚就係其中一款。平時食鯖魚多數係照燒或鹽燒，油分比較高，而用西式嘅煙燻方法則可以突出魚肉嘅甜味；上菜前快速火炙魚身，輕輕逼出油分，肉質更嫩滑之餘，感覺亦比較清新。
燒鮮鰻魚（$168）
鰻魚入口唔肥膩
一般Omakase店以壽司為主，而呢度就有多啲單點嘅和食料理、炸物等，配合唔同客人嘅需要。單點菜式同樣需要用心製作，而燒鮮鰻魚係佢哋工序最繁複嘅菜式！鰻魚到貨後，要自行劏魚、去潺、蒸熟同去骨，加上自家製燒鰻魚醬汁以鰻魚嘅頭同骨熬煮5-6個鐘，絕對係一道心機菜。鰻魚燒到皮香肉嫩，有油香而唔肥膩，醬汁則甜中帶鹹，做下酒菜都得。
吞拿魚腹筋（$80）
腹筋口感煙韌，佐酒一流
如果你鍾意試特別嘅菜式，呢道吞拿魚腹筋就啱你喇。顧名思義，呢道菜取材自拖羅邊位嘅腹筋，而6-7kg嘅拖羅肉只係開到1客腹筋嘅用量，所以呢道菜雖然長期on menu，但供應量有限，坊間亦比較少見。腹筋燒起後煙韌有咬口，配埋醬汁同蔥花，鹹鹹香香幾惹味。
晴空海之寶石特卷（$138）
想飽肚啲亦有晴空海之寶石特卷，係招牌菜之一。入面包著4-5款時令刺身，開飯仔採訪當日就有三文魚、北海道銀鱈魚、真鯛、赤身，再以北海道海膽同三文魚籽作點綴，鮮味又足料，顏色亦好豐富。
灸燒魚生飯（$158）係午市套餐之一
刺身大件足料
呢度嘅午市套餐都足料抵食。炙燒魚生飯選用時令食材，大件厚肉，而當日就有三文魚、右口魚邊、北海道帆立貝、鰻魚、拖羅同北海道銀鱈魚；火炙後再灑上日本嘅彩色芝麻，令香氣更突出。
地址：尖沙咀金巴利街8號地下1號舖
文：Cathy.C
相、片：Wilfred