新「吉邊」出場！繼分量十足嘅相撲鍋後，吉野家首次推出和風味濃嘅雪見鍋，以味道清甜嘅蘿蔔蓉做主打，令「吉邊」整體感覺好light，有如蔬菜鍋咁清甜。

新推出嘅雪見鍋中，有一球雪糕咁大嘅蘿蔔蓉、豚肉、蟹柳及其他蔬菜配料，另跟1款肉類、1款粉麵、1杯汽水及雪見鍋限定醬汁。

先揀選湯底，有濃湯、清湯兩款選擇。當湯底煮滾後，蘿蔔蓉會慢慢散開，與湯底融合。湯底煮得越耐，蘿蔔嘅清香更突出。而且粒粒蘿蔔蓉同埋其他配料一齊食都幾夾。

雪見鍋跟送蘿蔔柚子醋，味道酸甜，減輕肉膩感之餘，又能提味。店員教路，喺蘿蔔柚子醋之中加適量醬油，味道更佳。

豚肉用嘅係歐洲貨，約有80g，而且切得薄薄哋，好易煮熟。

豚肉頗有嚼頭，加上清香嘅湯底，口感不太油。如果連埋蘿蔔柚子醋一齊食，好清新，無乜肉膩感，不俗！

另外仲可以揀1客牛肉或雞肉。連埋以上豚肉，分量都幾足。

其他蟹柳、冬菇、金菇、豆腐、腐皮、粟米、娃娃菜等配料就與以往嘅「吉邊」相若，但隱約中都嚐得出蘿蔔獨有嘅小清新。

除咗烏冬，仲可以揀韓式粉絲、白飯或出前一丁即食麵架！開飯仔誠意推介烏冬，掛湯一流，又夠彈牙。

吉野家雪見鍋
供應期：3月22起至6月下旬
價錢：$68起
注：除九龍塘店、紅磡置富都會店、香港站店及油麻地中港匯店，全線分店均供應

文：Joy