今年聖誕想慶祝，但又唔想出街咁多人嘅話，相信唔少人都會選擇留喺屋企開party，同親朋戚友聚下，或者同另一半渡過一個浪漫嘅聖誕。今次同大家介紹下啲火鍋甜品套裝先，等大家甜甜蜜蜜咁過~

Sanrio characters限定外賣雪糕火鍋 Haagen Dazs 

Haagen Dazs聯同Sanrio推出咗三款可愛角色嘅外賣限定朱古力味雪糕火鍋，分別有Hello Kitty、My Melody同埋Pompompurin，每一set嘅雪糕火鍋都有8款，共32粒指定口味嘅迷你雪糕球，包括芒果紅桑子味、比利時朱古力味、 焦糖脆餅味等。凍冰冰嘅雪糕球點落微溫嘅朱古力醬度，朱古力醬瞬間成為脆膜包住雪糕，外脆內軟，令人食唔停口。而且Sanrio characters造型火鍋仲係用陶瓷做，食完可以洗返乾淨，擺喺屋企當裝飾，或者用嚟下次自製甜品火鍋都得，Sanrio迷要約埋開派對啦～

Häagen-Dazs™ X Sanrio characters限定外賣雪糕火鍋套裝
價錢： HK$529/套（免運費），每套Sanrio characters雪糕火鍋禮券另附送3張優惠券及Sanrio精美小禮物
推出日期：2020年11月12日起接受預訂，12月5日起開始換領
銷售點：全線Häagen-Dazs™門市及網上商店

瑞士D.I.Y.朱古力火鍋 Schoggi Meier

呢個瑞士朱古力品牌，一向主打用瑞士原材料Couverture 100% 可可脂朱古力製造傳統手工朱古力，今年佢哋更首次推出朱古力火鍋套餐，仲提供棉花糖、杏脯同埋開心果意式脆餅作為配料，另外大家仲可以自己準備一啲水果或者零食，點落濃濃嘅朱古力醬度，私心推介大家可以買啲士多啤梨點落去，酸酸甜甜嘅士多啤梨配上濃郁嘅朱古力，夠晒sweet池。

Schoggi Meier朱古力火鍋套裝
價錢：$260
銷售點：電話訂購及Schoggi Meie網上商店

文：Hailey
編：Kar