雖然這個冬天不太冷，但香港人鐘意打邊爐是常識吧。不過一般任食火鍋女朋友會覺得太麻甩佬Feel，去食近年新興部隊鍋又到男朋友話根本唔抵食，結果最後都係去快餐店食一人一鍋？開飯仔幫各位搵咗以下推介，唔同特色都有，好味之餘又唔怕埋單畀錢時「詐型」，啱用就參考下啦。
古風台式麻辣x美人鍋 老鍋台式火鍋
唔好誤會，古風係指尖沙咀呢間火鍋店裝修走中國古風路線，骨致得嚟有屏風隔開夠私隱度。鍋底有養生鍋、酸菜白肉鍋等選擇，不過計開飯仔話當然係嗌鴛鴦，一邊放惹味麻辣鍋，一邊放美人鍋啦。前者見到一層紅油就知夠味，入面仲要有台灣直送鴨血同冰豆腐，香而唔死辣。美人鍋就有南棗、烏雞、杞子，同有滋陰功效嘅桃膠等，清甜香濃。
日式健康鍋物 温野菜
打邊爐都可以多菜少肉，食得健康啲嘅。例如呢間喺尖沙咀同銅鑼灣都有分店嘅日式Shabu Shabu就有日本產地直送蔬菜，新鮮之餘仲食得安心啲。當然照顧埋各位男士嘅「肉」望，呢度亦有唔同產地和牛同豚肉，包括鹿兒島黑毛和牛牛肩同熊本豚腩肉等。最後湯底唔好嘥，加配料同麵或飯嚟個日式雜炊，就一定可以令大家都捧腹滿足。
升呢版烤肉x部隊鍋 Kim's Spoon
圖：A姐M佬
明，真係明喎，好多男士都唔明點解部隊鍋可以咁受歡迎吖嘛。其實女士們係為咗感受下同Oppa食同一款嘢食呢啲嘢......咳咳，講返正題，咁如果個部隊鍋有埋海鮮同烤肉又點睇？呢間連鎖店就有烤豬腩肉配辣海鮮鍋呢個抵食Package，鍋底有部隊鍋嘅香味，又有蝦、青口、蜆、魷魚等海鮮，中間仲要有烤豬腩肉，富脂香而唔太油膩。
中日Fusion 2人套餐 火薈中日火鍋
太子呢間樓上火鍋店係中日Fusion，裝修紅黑色主調夠形格，而且亦有屏風。小情侶必嗌超值豪華火鍋2人套餐，大大隻火鍋船上面有多款海鮮，包括鮑魚仔、帶子，珊瑚蚌、海蝦、生蠔等，仲有豬牛羊肉類拼盤、蔬菜同其他配料，分量同款式都夠多。最貼心嘅係包埋一人一杯紅白酒同甜品，慳返筆下半場飲嘢或者食糖水嘅錢吖嘛。
食豪啲靚料火鍋 canton pot
如果你嘅另一半覺得打邊爐最緊要係鮮味嘅話，咁旺角呢間酒店火鍋店就最啱喇。事先溫馨提示，講起酒店餐廳大家都估到消費唔算平，但質素嚟計絕對係一分錢一分貨。本地新鮮牛頸脊油花分佈平均，食落特別嫩滑。羊肚菌豚肉餃清香鮮甜，而松茸野菌福袋脹卜卜加上菇香撲鼻，兩款各嗌半份就啱啱好。另外呢度嘅甜品亦有多款選擇，女士們記得留肚。
臭味相投臭臭鍋 8鍋臭臭鍋
圖：babyzbb
唔好話開飯仔無提醒大家，去尖沙咀呢間店食臭臭鍋之前，請先再三肯定你同你嘅男朋友或者女朋友都係重口味人士：因為呢度嘅臭臭鍋係台式臭豆腐鍋呀！招牌臭臭鍋唔單止有台式臭豆腐，連貢丸、米血糕、甜不辣等配料都係由台灣入口，十足台灣風味。晚市有限時90分鐘，建議午市去慢慢嘆！不過食完之後一身臭豆腐味頂唔頂得順就另一回事喇。
文：Cathy
開飯編輯推介：
2. 11月份好評餐廳十強
熱門文章推介：
隨時接收最新資訊
讚好OpenRice專頁！
