蟹粉迷注意！尖沙咀K11 MESEA最近有一間時尚蟹粉麵店進駐，菜式都以鮮拆大閘蟹蟹粉及蟹肉製成。菜單上選擇貴精不貴多，主打包括一系列招牌蟹拌麵，嚴選超過150克丶即3兩重的江蘇大閘蟹製作，所用上嘅蟹粉丶蟹肉及蟹油比例皆由廚藝團隊經過多番試驗調配出的黃金比例，啖啖都係又香又濃嘅蟹膏味呀！

餐廳設計以30年代的上海酒廊為靈感，餐桌椅組以桃木特製，仲有標誌性霓虹燈光，更顯懷舊風情。

特濃蟹粉蟹肉拌拉麵($368)

招牌特濃蟹粉蟹肉拌拉麵！用咗足足12隻大閘蟹嘅蟹粉，嚴格規定公蟹粉及母蟹粉嘅比例為58比42，而拌麵嘅蟹黃就蟹肉及蟹油各佔一半。拌麵上枱嗰陣會將麵條及配料，包括「雞湯配蟹肉」丶「蟹腳肉」丶「蟹公膏」丶「蟹母膏」丶「蟹油」分開呈上，食客可自行加入配料，並根據個人喜好將醬油及蟹醋倒入，配埋每日新鮮即製嘅手工麵條，蟹膏味勁香濃！

原隻花膠釀蟹粉拌寛麵($888)

另一道蟹粉拌麵賣相夠晒吸睛！原隻南非花膠內注入滿滿蟹黃醬，並加上魚子醬作點綴。蟹黃醬同樣以公蟹粉丶母蟹粉及蟹肉拌成，黃金比例為5比3比2。上枱時會即席於食客面前將花膠輕輕切開，蟹黃醬會慢慢流出，好治癒呀。

上三兩蟹黄魚濃湯掛麵($188)

湯底以十幾款唔同種類嘅季節性鮮魚熬製逾10小時而成，並加入以鮮蝦頭製成嘅醬汁，令湯底更鮮甜。蟹黃醬同樣混合咗公蟹粉丶母蟹粉及蟹肉，加埋魚湯底食就輕怡啲。湯麵仲搭配埋去骨黃魚件，炸得香口又惹味。

蟹粉煙燻鴛鴦溏心蛋($78)

另外仲有幾款以蟹粉入饌，啱晒相機食先嘅小食！蟹粉煙燻鴛鴦溏心蛋加上甘香嘅蟹油及法國品牌Caviar House & Prunier魚子醬，一入口有陣陣煙燻味及魚子醬鹹香。

蟹粉黃魚餛飩($158)

餡料以蟹粉搭配切成細件嘅黃魚肉，湯底就以濃香魚湯及蝦頭膏油製成，濃郁鮮甜。

醉三兩($128)

花雕醉南非鮑魚搭配鮮帶子及海膽，加上蟹粉，味道鮮上加鮮。

燕窩伴薑味意式雪糕及啫喱($88)

上三兩

地址: 尖沙咀梳士巴利道18號 K11 Musea 4樓 401A號鋪

文、相、片: Yanica