又有韓流襲港喇~ 嚟自韓國嘅人氣甜品店最近登陸尖沙咀商場，有多款奶油捲堂食又得外賣又得。喺韓國最受歡迎嘅就係士多啤梨味，但開飯仔試過後，發現香蕉味係最有驚喜嘅！

以奶油捲聞名嘅Le Bread Lab，每件奶油捲都係由口感綿密、蛋味十足嘅蛋糕，半開合咁夾住幼滑嘅忌廉，面頭再放上生果或者朱古力。香港分店都會沿用韓國原有嘅食譜，忌廉、蛋糕等食材仲會由韓國以低溫運送過嚟添~

最好賣嘅係士多啤梨奶油捲，啲士多啤梨好香甜。不過就冇單件裝賣，一次過最少都要買四件。細細聲講，睇落好似好多，但其實OK架，一個女仔都食得晒~ 因為啲cream好light好light，而且蛋糕仲好似棉花咁鬆軟，唔會好漏啊。

另外仲有鮮芒果奶油捲、士多啤梨朱古力奶油捲、mocha奶油捲等，每款嘅cream都唔一樣，例如好似mocha嗰隻咁，啲cream就係用expresso咖啡豆去製作，所以咖啡味都好香濃，就連蛋糕嘅味都唔同。

香港仲有香港店先有嘅限定版——雜果奶油捲，上面舖滿多款時令水果，包括香印提子、藍莓 、芒果同士多啤梨。不過呢款坐底都要買12件先得。

但數到最有驚喜嘅就非香蕉奶油捲莫屬喇！連個cream都係香蕉味嚟，係用真‧香蕉肉去打造架，好有質感。

一場嚟到，除咗食奶油捲外，推介仲可以試埋冬日特飲，紫薯牛奶！加入咗新鮮紫薯蓉去製作，味道濃郁，杯面撒上心形紫薯粉，真係飲到個心都溶。

每日新鮮製造嘅士多啤梨牛奶內，亦有粒粒士多啤梨肉。士多啤梨奶茶味道相對較濃，同樣推薦。

成間舖仲周圍都係粉紅色，就連隻叉都係粉紅色，不得了，簡直就喺度呼喚緊萬千少女啊！

LE BREAD LAB
地址：尖沙咀美麗華商場一期3樓303號舖
正式開業日期：12月28日（現為試業階段）

文、相、片：Kar