我相信世界上無嘢可以再阻止香港人食火鍋嘅心，而家連主打豬扒米綫嘅餐廳都即將推出任飲任食火鍋，而且價錢百零蚊，仲不設加一。食物方面有貴妃蚌、象拔蚌、蟶子等海鮮，肉類亦有牛雞豬羊魚，質素不俗，即刻睇開飯仔率先試食報告先！

準備開餐之前，令開飯仔好奇嘅係眼前呢個與別不同嘅火「鍋」。呢個鍋原本係小型鑄鐵鍋，比起一般鍋更快受熱，加上鍋中間有個小煙囪，令火力得以平均，亦令食物更快熟。柯打任飲全食嘅客人會一人一鍋，不過要注意嘅係，一受熱整個鍋都會變得滾燙，要小心！小心！小心！

介紹湯底先，有清湯、麻辣湯兩種選擇。清湯係以雞骨、豬骨等熬成，而麻辣湯再分小、中、大程度，另加$10更可試地獄辣！

師傅用牛油炒香紅椒、乾椒，令辣椒嘅辣味更加突出，亦更有油香。湯色雖然未至於鮮紅色，不過辣勁依然十足。師傅會按不同辣度增加辣椒分量，越食越辛辣。

每位客人會有1份海鮮拼盤，入面有象拔蚌仔、貴妃蚌、蟶子、海蝦、花甲及斑片6款海鮮，全部由香港仔魚市場直接送達到店。美中不足嘅係，海鮮只包每位1份，如果食完想追加，可加$68多要一整份海鮮拼盤。

海蝦（左）都幾生猛，肉質鮮甜；蟶子（右）吸收辛辣湯汁，加上蟶子肉甚為爽口，一邊咀嚼，辣味一直滲透，好正！

同樣爽口彈牙嘅象拔蚌（左），肉質比起蟶子更厚身，鮮甜度更勝一籌；相較之下，斑片（右）就略為遜色，魚肉可再厚身啲，食落會更有口感。

Size細細嘅花甲，分量不多，亦不太有「肉」食，但勝在夠鮮甜。

其他火鍋配料如豬牛羊雞、丸類、蔬菜等則任點任食。呢款美國肥牛油花分布平均，顏色又夠鮮紅。淥幾秒後拎起，薄切牛肉嘅肉質既充滿油香又有嚼頭，絕對係encore之選。

除咗美國肥牛，肉類仲有西班牙黑豚肉、紐西蘭羊肉片、雞件及豬頸肉，肯定滿足到一班食肉獸。

西班牙黑豚肉脂肪不多，食落不太感油膩，怕肥女生多食幾塊亦無妨。

其實必食配料有店子手打嘅墨魚丸、蝦丸，以及自家製雲吞、水餃，心機配料不可放過。還有脆肉鯇魚片、鮮鯇魚片、九肚魚、白百葉、黑百葉、水魷、竹笙、米線等，一共有50款任食配料。

客人可自行去餐廳內嘅飲品櫃，任拎櫃內嘅汽水、竹蔗茅根等各款無酒精飲品，不設酒精飲品提供。至於火鍋調味料，餐廳設蔥花、蒜蓉、椒絲、芫荽碎及豉油5款選擇。

任飲任食火鍋將於今個星期四，即3月29日開始，全日都有供應，價錢為$128/位，原價為$158。3-8歲小童可享半價優惠、3歲以下小童免費，不設加一。

阿一豬扒酸辣米綫
地址: 尖沙咀寶勒巷29號地下
注：不設預約

文：Joy