Cafe熱潮蔓延到大角咀，呢間新店走台式文青風格，主打吐司、意粉同咖啡，仲有毛孩Menu歡迎大家帶埋狗狗去。必食招牌總匯吐司，層次豐富又足料。咖啡就選用由世界咖啡師冠軍主理嘅台灣品牌出品，其他特飲都好有特色，其中一款仲係叫姜啜濤！
 

一浪位於大角咀利得街，店名其中一個意思嚟自浪浪（流浪貓狗），因為其中一位店主自己都有養柴犬，希望開一間寵物友善Cafe，有能力嘅話會考慮將部分收益捐贈至本地嘅保護流浪動物機構！店內亦有Pet Parking鉤同Pet Menu。
 

一浪總匯吐司（$78）

大大份台式吐司，入口先品嘗到花生醬嘅香甜，再食多幾啖就會食得出日本雞蛋嘅蛋味、青瓜同蕃茄嘅清爽、鹽燒雞髀滑嫩有彈性嘅口感，無論味道同口感都好豐富！值得一提因為其中一位店主曾經喺台灣留學，所以吐司用嘅花生醬同美乃滋（蛋黃醬）都係特別調配成台南風味，有一種獨特嘅甜味！麵包亦特別挑選本地製造嘅新鮮方包，烘過可以保持鬆軟。
 

煙醺鮭魚明太子義大利麵（$78，上班日限定）

以煙燻三文魚配搭明太子，前者鹹中帶鮮、後者鹹香辛辣，所以建議加埋頂層嘅紫蘇葉同紫菜一齊食，紫蘇葉幽香可以降低部分鹹味，同時帶起三文魚鮮味。意粉亦有加入本菇同鮮忌廉，醬汁香濃。
 

美好時光CROFFLE（$68）

Croffle用本地製造嘅法式牛角酥麵團即叫即做，用窩夫機烘出一格格嘅酥脆口感。再配搭冰凍香甜嘅雲呢拿雪糕，同當季新鮮莓果。Croffle嘅牛油香同雪糕好夾，士多啤梨同藍莓酸甜多汁中和膩度。
 

凍橙啡（$45）

咖啡豆選用台灣興波咖啡Simple Kaffa嘅出品，例如呢杯凍橙啡用嘅就係阿寶綜合，係一款糅合巴西同洪都拉斯咖啡豆、帶烘烤果仁香同朱古力香嘅咖啡。建議大家先品嘗濃縮咖啡嘅原味，再搞勻連橙汁一齊飲，咖啡嘅堅果香加上橙嘅酸甜變得清新。
 

 

姜啜濤（$43）

到底姜啜濤係咩？答案係無酒精Mojito加上Ginger Ale嘅特飲呀。原來其中一位店員係姜糖，所以就諗到將呢杯飲品明名為姜啜濤，仲以姜濤嘅生日（4/30）嚟定價（$43.0）！Mojito嘅青檸同薄荷味道清新沁涼，加上Ginger Ale嘅薑味同氣泡口感，感覺非常消暑。
 

抹茶牛奶（$38/熱，$42/凍）

挑選日本鹿兒島澤田園嘅有機抹茶，味道濃郁而且顏色翠綠。沖成抹茶牛奶後聞起嚟有類似紫菜嘅鮮味，飲落微甜帶悠長回甘，口感厚滑無粉粒。加埋可愛拉花圖案，色香味俱全。
 

店內亦有售賣台灣興波咖啡Simple Kaffa嘅掛耳包咖啡，有阿寶綜合、埃塞俄比亞谷吉日曬（士多啤梨、水蜜桃、佛手柑風味）、埃塞俄比亞西達摩水洗（花香、蜜柑、阿薩姆紅茶風味），特別推介巴拿馬翡翠莊園藝伎日曬（佛手柑、士多啤梨、桃風味）。
 

特設Pet Menu，由店主朋友金媽，用人類食用等級嘅食材去炮製嘅鮮食，而且無添加糖、鹽或任何調味料，各位主人就可以放心畀狗狗享用。
 

一浪
地址：大角咀利得街26號地舖

文、相：Cathy