又有一間過江龍趕住喺年尾前抵港！今次係來自台灣新竹市、已於台灣有17間分店嘅牛肉麵專門店段純貞，開業十三年至今仍然係當地嘅人龍店。品牌堅持唔用現成桶裝牛脂製作，而係使用新鮮肥牛提煉出天然牛油脂，段純貞嘅牛肉麵更曾被「台灣美食教父」焦桐參與編製嘅《臺灣牛肉麵評鑑》中獲選為「5顆星牛肉麵」，而家香港都終於有得食喇，12月1日正式開業！
香港店將會供應一系列招牌麵食，將沿用台灣總秘方炮製所有麵食，包括牛肉嘅靈魂牛骨湯底。而且餐廳嘅牛肉麵比較偏向眷村牛肉麵，添加咗四川郫縣豆瓣醬及高雄岡山豆瓣醬增添風味。
麵底方面每款麵都可自選手工粗麵或幼麵，前者有口感而且滑溜，而後者就更能吸收湯底精華。
紅燒腱心牛肉麵（$80）
必食招牌紅燒腱心牛肉麵，先講湯底，用上牛大骨、23種中藥材及香料慢火細燉數小時而成，然後靜置過夜，食落去溫而不火、濃而不膩。而且特意選用上筋肉比例最佳嘅牛腱心，每隻牛嘅牛腱心只可製成五碗牛肉麵，呢個部位油脂呈花紋狀，川燙後會同23種香料及豆瓣醬一齊燉煮，Q彈又有肉香。
三寶麵（$88）
三寶麵嘅湯就同樣都係牛骨湯底，不過如果想試多唔同部位，呢碗麵就有牛腱心、牛肚及牛筋，牛筋軟腍而不爛，而牛肚都彈牙入味。
麻辣蒜味腱心半筋半肉麵（$84）
知道香港有唔少嚐辣人士，呢個麻辣蒜味腱心半筋半肉麵辣得嚟又唔會太嗆口，兼有椒麻嘅香氣。餐廳選用了花椒或青花椒、辣椒及胡椒令香氣及味道更有層次，另外加埋少少八角、老薑、紅蘿蔔同白蘿蔔熬製8小時，令牛肉湯味道更溫和。
燉濃湯雞麵（$78）
口味偏向清淡嘅朋友，呢碗燉濃湯雞麵就啱晒喇！湯底呈少少杰身狀態，有雞味之餘仲好清，而雞髀以慢煮方底烹調，肉質嫩滑。
滷水拼盤（$78）、紅油抄手（$48）、香麻醬涼拌豆腐（$48）
另外餐廳亦有供應小食，香麻醬涼拌豆腐香中帶微辣；紅油抄手係台灣老闆家傳嘅小食，集鮮香、麻辣及酸爽於一身；滷水拼盤有齊牛肚、牛腱、溏心滷蛋、豆乾及鮮菌，適合叫一個同朋友分享。
地址: 荃灣楊屋道8號如心廣場1期1樓105-107號舖
文、相、片: Yanica
