成日都聽到香港人對食愈嚟愈有要求，唔止要好睇、好食，仲有最緊要健康！為此，OpenRice特意製作一系列健康飲食嘅專題《OHealth!》，help大家食得「營」啲！首季就先以牛油果做主題啦。

牛油果係近年最流行嘅superfood，有極高嘅營養價值，而家喺好多主打健康嘅餐廳都會見到佢嘅身影。雖然有人或者會質疑牛油果脂肪含量高，但其實所含嘅脂肪大部份都係不飽和脂肪，只要適量地攝取，對身體都有唔少好處。一齊睇下牛油果有咩功效喇～

1. 減低患上心臟病風險

根據美國心臟協會雜誌研究發現，每周至少食一個牛油果有機會降低患心臟病嘅風險。牛油果含有膳食纖維及不飽和脂肪，對心血管健康有益處，更有助降低膽固醇。研究人員喺研究中測量咗68,786名30-55歲嘅女性同41,701名40-75歲嘅男性，同好少或從來唔食牛油果嘅人相比，每周至少食兩份牛油果嘅參與者，患心血管疾病嘅風險降低咗16%，患冠心病嘅風險降低咗21%。唔少人用牛油果代替牛油、芝士及加工肉類等含脂肪食物都同降低患心血管疾病嘅風險有關。

2. 抗老化

女性們最關注嘅功效！根據美國美容皮膚病學雜誌於2022年1月發出嘅研究表示，佢哋搵咗39名年齡27-73歲嘅女性進行測試，每日食一個牛油果持續8星期，前額彈性同緊實度明顯增加。因為牛油果含有不飽和脂肪酸、類胡蘿蔔素同酚類化合物等，有效改善皮膚老化等問題。想keep住青春？你識揀啦。

3. 預防骨質疏鬆

牛油果對預防骨質疏鬆都有效，牛油果含有豐富嘅維他命K，維他命K對骨骼健康重要，而半個牛油果已經提供每日建議嘅維他命K攝取量約1/4。另外牛油果含有嘅多酚及類黃酮亦有助預防關節炎及其他炎症。

4. 有益眼睛

根據nutrition雜誌一項研究表明，牛油果有助大幅降低白內障同黃斑變性嘅風險。牛油果富含類胡蘿蔔素、葉黃素同玉米黃質，有助於保護同維持眼睛內嘅健康細胞，而且提供抗氧化保護，幫助減少紫外線傷害。另外亦含有抗氧化劑，降低患老年性黃斑變性嘅風險。

5. 有助減輕體重

牛油果含有不飽和脂肪酸，有助於增加飽腹感，同時減少進食嘅慾望，而且牛油果膳食纖維含量高，碳水化合物含量低，對於減肥嘅女士係一大恩物。不過牛油果嘅熱量比較高，記得每日唔好攝取過量，咁就可以放心食啦。

文：Yanica
編：Kar

【OHealth!】 牛油果篇

口袋名單 5大牛油果餐廳推介 (傳送門按此)
5大貼士！果檔檔主教你揀牛油果 (傳送門按此)
歪歪實試！尖沙咀牛油果主題cafe 釀春雞/汁煮意粉  (傳送門按此) 
輕鬆食譜跟住整 牛油果兔兔油揚Taco (奶素) (傳送門按此)
坊間流傳4種牛油果食法 即場實試邊款最好食 加納豆竟然唔係最伏？ (傳送門按此)