好多人都鍾意食辣，仲要愈辣愈刺激。尖沙咀最近新開咗一間正宗四川菜餐廳，打正旗號出「辣」招！廚師團隊更曾去過四川考察，將當地嘅獨家香料同醬汁帶返嚟香港，炮製一道道紅噹噹嘅火辣菜式。

四川辣椒有好多種，二荊條、青花椒、子彈頭、鬼椒、四川生抽、豆瓣醬等等，每種嘅辣香同辣度都唔同，menu上嘅菜式，大部分都混合用多過一種辣椒去製作呢。未入到餐廳，喺門口就已經傳嚟好大陣嘅麻辣香味喇。

 蒜泥白肉

先介紹涼菜，蒜泥白肉望落係最唔辣嘅一道菜式，但都有加入自家製辣椒油、甜醬汁等製成醬汁，香口得嚟蒜味濃厚。啲蒜泥係自家製嘅，creamy到有少少似薯蓉。白肉仲捲住片青瓜，有助中和少少膩感。

 (左)麻辣口水雞、(右)夫妻肺片

麻辣口水雞同夫妻肺片就開始嚟料喇。成碟都係紅噹噹，好似好辣嘅樣。但食落就會發現「吖你辣得咁mild嘅？」原來係師傅有就住大家嘅，小辣溫和，自問好食得辣，或者一心想嚟挑戰嘅朋友仔，可以試揀中辣或者大辣啦。講返隻麻辣口水雞，辣椒油都分咗兩層，上層係自家製嘅，下層以薑米、蒜蓉、四川生抽、四川辣椒粉、麻油同芝麻醬等調配而成，再喺面頭灑上以青花椒磨成嘅粉，麻辣鮮香，雞肉亦嫩滑。

 干鍋鮮田雞

小炒方面亦有多款選擇，推介干鍋鮮田雞，用上子彈椒、鬼椒、青紅花椒、辣椒粉豆瓣醬去調配辣度。而以明火上枱，更能將洋蔥等配菜嘅香味逼出嚟。不過，田雞依然只係微辣，冇搶走到鮮味，肉質彈牙。

 水煮桂花魚

至於水煮桂花魚當然係主角，滿缸紅中，除咗有一片片軟腍入味嘅桂花魚之外，另外仲有四川薯粉、四川鴨血、荀、大豆芽、青瓜等配菜。湯底辣汁以辣椒皇同二荊條打磨再加自家製辣酒爆香，各種配料索晒啲辣汁，先麻後辣，花椒味香。

麻辣五三五 
地址：尖沙咀寶勒巷10號8樓

文、相、片：Kar