牛油果除咗原個啪，或者一般搽麵包、點tacos外，坊間仲有各種形形式式嘅創意配搭。開飯仔今次就搜羅咗其中4種配搭，全部都好易整，唔使開爐開鑊，撈下攪下就食得。整好後就搵嚟幾位勇者同事即場試食同評分，睇下邊款最好食！

配搭1：牛油果x  Wasabi + 豉油 = 三文魚？

製作：
呢個食法最方便簡單，好似食壽司刺身咁唧啲魚生豉油加Wasabi就可以。

食評：
同事Cathy:  個texture係有少少似魚生，如果你嘅想像力豐富啲的話，第一下係呃得到人嘅。
同事Clement: 好特別、好新穎囉，但感覺唔似三文魚或刺身。
同事Kary: 感覺都幾似三文魚，都幾開胃

總分：10.5/15

配搭2：牛油果x  納豆 + 芥末蜜糖

製作：
買盒納豆返嚟，撈勻啲醬後嗶上牛油果面，直接食得。

食評：
同事Cathy:  我自己會食納豆嘅，比我想像中夾喎（呢個組合）感覺上有啲似抹茶加紅豆咁樣。
同事Clement: 好重納豆味，個人好唔鍾意納豆，我覺得有啲…臭。有冇得負分呀呢個？
同事Kary: 好苦呀，食唔到牛油果味，納豆嗰種獨特嘅味已經完全蓋過咗牛油果清新嘅味。

總分：5.5/15

配搭3：牛油果x  吞拿魚 + 腐乳 + 黑椒

製作：
都好易整，全部嘢撈埋一齊，拌勻就得。至於份量同比例，就按個人喜好隨心啦，怕太鹹嘅，半磚仔腐乳都好夠味。

食評：
同事Cathy:  罐頭吞拿魚太鹹，淨係得吞拿魚鹹味，食唔到牛油果味。口感都ok夾嘅，但我就應該唔會咁食。唔係好食得出腐乳味，但呢兩個食材個味道蓋過晒牛油果本身嘅味，所以唔覺得好食。
同事Clement: 好鹹呢個，係咪有啲肉碎定唔知咩喺入面？呢個味道非常之重口味。（有腐乳、吞拿魚，同埋有少少黑椒，講完有冇覺得食得返？）食唔太返喎。
同事Kary: 呢個……好鹹。未至於鹹魚，但係好鹹嘅魚味。

總分：4.5/15

配搭4：牛油果x  益力多 = 牛油果雪糕

製作：
呢個相對多少少功夫，牛油果切好後，連埋益力多倒入攪拌機肉，快速攪拌。然後雪入雪櫃。

食評：
同事Cathy:  食落幾重益力多嗰隻酸酸甜甜嘅味。呢個組合唔係話唔好食，但好似冇咩特別加分到
同事Clement: 呢個幾好食，好食好多。應該有啲菜嗰啲嘢喺入面？比較清新啲，如果再凍啲會好食啲。
同事Kary: 好清新，係咪有生果喺入面？蘋果？呢個大家可以試下。

總分：12/15

大家都可以自己嘗試唔同嘅配搭食法，如果有啲咩新奇又出奇好食嘅配搭，歡迎大家IG inbox（按此）同開飯仔分享呀！

文：Kar
相、片：Wilfred Chui

【OHealth!】 牛油果篇

牛油果5大功效！有助減磅及抗老化   (傳送門按此)
口袋名單 5大牛油果餐廳推介   (傳送門按此)
5大貼士！果檔檔主教你揀牛油果 (傳送門按此)
歪歪實試！尖沙咀牛油果主題cafe 釀春雞/汁煮意粉 (傳送門按此)
輕鬆食譜跟住整 牛油果兔兔油揚Taco (奶素) (傳送門按此)