唔少人去街市熟食中心開飯都係為咗慳錢，但對銀包好啲之餘同時其實亦可以對自己肚皮好啲嘅。葵涌和宜合道熟食市場12年一場火災過後，經過翻新環境都算乾淨企理。走入圓形格局嘅熟食中心，你會搵到日本人主理嘅正宗日本菜，抵食嘅台式肉燥飯，地道嘅印度咖喱，最緊要嘅係Lunch嚟食飯包埋飲品大部分都係$30左右，夠哂抵食！
東京大廚茶漬飯 満足食堂
去街市熟食中心食正宗日本菜？你無睇錯，呢度嘅老闆兼大廚係東京人，嚟香港擔任一間日本餐廳嘅料理長近10年後自立門戶，揀呢度都係貪租平兼翻新過後夠企理。食堂有鐵板燒、丼飯、定食、咖喱等選擇。不過呢度最多食家推薦嘅係靜岡蒸蛋同茶漬飯，前者口感似梳乎厘入口即融，後者濃淡得宜不失食材鮮甜。
抵食台式肉燥 瀛珍美食
見到個名以為又係日本菜？Sorry呢間餐廳雖然檔口唔大，但一睇黑板上面嘅今日推介由日式豬軟骨拉麵到越南鮮牛河都有，當中又以台式肉燥最抵食。例如呢個肉燥雞扒撈拉麵，肉燥落得夠爽手夠撈麵，雞扒亦大大份，真係唔夠仲可以加飯或麵底，個餐仲要包一杯台式飲品，就算男士都唔洗驚唔夠飽。
水準吉列便當 山本吉列料理
又一間日式小店，睇個名就知呢間嘅招牌係吉列丼飯，最好嘅地方係佢地有做外賣同外賣自取，記得早半個鐘提前落單，咁就食到好味日式便當啦。吉列厚切豚肉日式咖喱飯嘅咖喱汁會分開裝，吉列豬扒同飯都唔會浸到淋哂。薑汁豚肉飯味道同分量都對板。最後一提呢度仲有隻店貓叫妹頭，嚟食飯嘅時候可以留意下唷。
重口味印度咖喱 咖哩烤肉和印度餐廳
日本菜同台灣菜都唔夠重口味？呢度仲有間印度人開嘅印度餐廳，齋食免費送嘅小食威化胡椒餅就知道呢度嘅出品夠哂惹味。最多食家推介嘅係什菜咖喱角，炸到金黃香脆嘅皮裡面有香口咖喱薯仔同雜菜，點埋薄荷醬食落無咁油膩之餘仲突出咗咖喱嘅香濃。唔少香港人最愛嘅芝士烤餅同咖喱菜式都相當抵食。
港式鑊氣小炒 祥和
每間熟食中心都總會有間小炒王（好似係），而葵涌和宜合道熟食市場嘅代表就要數到呢一檔，午市嚟食返碟大大份嘅即叫即炒粉麵飯應該都算係一種男人的浪漫（應該係）。豉椒雞飯上枱見到一粒粒拍碎嘅胡椒而唔係用一早磨碎哂嘅嚟交行貨已經先加一分，食落胡椒辣味同香味都夠出，有鑊氣而唔油膩，係咪值得再加分先。
額外推介！回憶中嘅炸雞髀 食口福
以上5間餐廳食完都係意猶未盡？得，推介多間港式懷舊快餐店畀各位為食友啦。入到去見到個懷舊裝修同Open Kitchen，就知呢間應該係唔少附近街坊嘅集體回憶。最出名嘅佢地嘅炸雞髀，有食家話大到好似塊乒乓球拍咁！雞髀會先炸一次，有客Order就翻炸一次，所以雞皮絕對夠脆。漢堡包餐同茄汁雜扒餐都係大件夾抵食嘅代表。
文：Cathy
更多【熟食中心尋寶】：
3. 大埔墟街市一日五餐之選
熱門文章推介：
隨時接收最新資訊
讚好OpenRice專頁！