無論你有冇去過泰國曼谷，只要你搜尋曼谷必食，呢間粉紅水門雞飯都一定出現，皮薄肉嫩，價錢又抵食。不過近日有線人報料，話喺大埔發現有間新開嘅水門雞飯，到底咩事？難道餐廳嚟咗香港開店？

經開飯仔細問之下，原來老闆李生一直係曼谷粉紅水門雞飯嘅粉絲，一年都會飛去5、6次去食雞飯，食咗十幾年，好想喺香港開番間質素拍得住水門雞飯嘅餐廳。「我哋想做到控制品質，所以煮雞工序會喺火炭工場做好先運落餐廳。雞方面，因為泰國雞煮出來好易嚡口，所以我改用本地雞，雞味較濃，肉質亦嫩滑啲。」大廚煮熟雞隻後攤涼，放入冰水，再放入用雞骨熬成嘅雞湯中浸，令味道濃郁啲。

招牌水門雞飯($48)有大約1/4隻雞嘅雞肉、油飯、調味汁及冬瓜湯。雞味的確夠濃，皮肉分明，仲有層啫喱狀嘅膠原蛋白，若雞皮無咁厚口感更佳。

至於泰國米飯比較長身、有嚼頭，無珍珠米咁圓碌碌，用埋雞骨、香茅、泰國香料等煮成嘅湯汁一齊煲飯，令米飯都有淡淡嘅雞味。醬汁由泰國辣椒、南薑、紅椒、麵豉、醋等調成，味道酸辣惹味，突顯濃郁嘅雞味，配油飯一齊食，好正！如果不夠辣，仲可以用匙羹擠一下辣椒粒架！

冬瓜湯材料簡單，有冬瓜、雞骨、胡椒等，湯水好清，夠解渴。

而另一款水門炸雞飯($48)同樣跟冬瓜湯、油飯，不過就變咗炸雞扒，食落都幾香口，入面嘅雞肉依然保持濕潤，不會太乾。搭配嘅自家調甜酸醬多啲甜味，幾開胃。

除咗雞飯，餐廳亦有幾款即煮粉麵。開飯仔推介鴨腿湯河($48)，湯底都係用雞骨及泰式香料熬成，再連同金邊粉、大大隻鴨腿、芽菜、炸蒜及炸雲吞皮而成，食落有多重口感。

鴨腿比想像中炆得軟腍，而且都幾吸湯。金邊粉質地有啲似幼身版伊麵，而且多扁身，一樣咁吸湯。

秘汁泰式生蝦($98)係泰菜餐廳常見菜式。客人可食到越南虎蝦嘅鮮甜，更重要嘅係，可品嚐到非常惹味嘅酸辣汁，以泰國芫荽、醋調成，旁訪仲有清爽苦瓜伴碟，沾少少酸辣汁同食最滋味。

材料豐富嘅金柚子沙律($68)，入面有泰國柚子、蝦、炸椰絲、花生、泰國芫荽、辣椒、紫洋蔥等等，酸酸甜甜，用作前菜非常適合。

泰國另一名物——芒果糯米飯($48)，採用香甜嘅泰國芒果，加埋煙韌糯米飯、香滑椰漿以及炸黃豆粒，口感一流。

用煉奶沖調而成嘅泰式奶茶($16)，經過調較後甜度減少，只係比港式奶茶微甜。

餐廳設半開放式廚房，擺放透明掛雞架，加上不銹鋼枱凳、水泥地，打造出一個街坊味濃嘅地踎小店。

水門雞飯
地址：大埔汀角路11號地下

文：Joy