開飯仔早前嘅「中秋快閃Popup！實試台灣一芳水果茶」報導，不少讀者反映番一芳茶飲幾好，有質素！今次一芳正式進駐香港，去到旺角朗豪坊開舖頭！除咗繼續有中秋限定店時供應嘅6款招牌茶飲之外，新店亦提供更多好有「台」風嘅古早味茶飲，而且仲有限定冬季熱飲添，即刻睇睇！

新店貫徹番「Made in Taiwan」嘅概念，用嘅茶飲食材全部來自台灣，以台灣農場嘅新鮮水果搾汁而成，連果醬都係一芳自家熬製，絕不加任何化學濃縮汁。

再次介紹番一芳嘅招牌水果茶($30-$33)，以青茶做底，再加蘋果、橙、百香果、鳳梨醬、檸檬汁等配料，味道好fresh，鮮果味道好natural，果然係招牌茶飲！

新飲品之中，開飯仔最想推介呢個中華愛玉檸檬($26-$29)，飲品由綠茶、愛玉、檸檬汁、青檸片等組成。製作愛玉嘅時候，店員仲會加入少許檸檬汁提味添！

愛玉分量多，好厚身，而且食落有啲檸檬獨有嘅澀味，味道好真！

紅卜卜嘅金峰洛神檸檬($20-$23)預先調配好甜度嘅洛神花汁，加埋洛神花、青檸片等食材，飲落好酸、好解渴，嗜酸之人一定要試！

信義脆梅綠($24-$27)先用綠茶底，再加入青梅汁，以及原粒脆梅。味道偏甜，如果想試嘅話，柯打時可要半糖都足夠。

原粒脆梅好爽脆，舖頭仲幫客人挑咗粒核，不妨試食下！

關西仙草茶($17-$20)喺冬瓜茶入面加入仙草汁，令香甜冬瓜汁多一份仙草嘅微甘，飲落完全係「涼粉汁」嚟。

另外店子亦推出4款冬季限定熱飲，當中必試嘅有桂圓紅棗茶($20)，將桂圓、紅棗以及台灣黑糖煮約1小時而成。桂圓、紅棗好大粒，桂圓嘅甜味好天然，飲完好滋補。

另一杯薑汁檸檬($20)用自家磨成嘅薑汁與檸檬汁混合，加入黑糖再煮大約40分鐘而成，味道都幾夠「薑」，飲完成個人會暖笠笠。

仲食到少少檸檬肉添！

舖頭好開揚，令客人可睇到整個茶飲嘅製作過程。而且舖頭裝潢如水磨石牆身、碎花瓷磚等，好有台灣早期嘅簡約風格。

一日限定！$1 新張優惠

凡於12月15日買任何飲品加$1，就可以換購中杯裝嘅一芳招牌水果茶1杯。優惠分12:00-13:00、17:00-18:00兩個時段進行，每個時段各設100杯，想飲就要把握星期五喇，換完即止！

嚟緊港島區、新界區都會開店，仲會推出特別口味添，一齊又期待下啦！

一芳台灣水果茶
地址：旺角亞皆老街8號朗豪坊4樓20號舖

文：Joy