對甜品控嚟講，甜品就係有個特別嘅地位，無論早餐午餐下午茶定晚餐都可以食，而且並無所謂正唔正餐先嘅概念。以下呢3間甜品店，分別照顧到朱古力、蛋糕同曲奇嘅愛好者。

朱古力專門店 Céleste Artisan

 圖：餐廳IG

氹仔舊城區裡面有個藝術園區，唔單止可以去打卡，更可以食返杯大受歡迎嘅朱古力雪芭唷！皆因當中有間選用法國百年知名品牌Valrhona朱古力製作飲品同甜品嘅專門店，最出名嘅朱古力三重奏包括朱古力雪芭、朱古力牛角包同朱古力摩卡，黑朱古力香氣濃郁又唔會太甜，自問係朱古力控嘅要搵機會去朝個聖。

低糖主義烘焙小屋 簡約

 圖：餐廳IG

龍園同創匯呢間蛋糕店由網店起家，主打低糖主義、追求天然同真材實料嘅蛋糕。最貼心嘅係佢哋唔少口味都可以揀切件或者係小圓蛋糕，自己一個獨食都無問題！唔鍾意甜食？佢哋亦有咖啡同貝果，特別係芝士咸牛肉貝果同斑蘭紅豆貝果，配搭創新只此一家啊。

創意口味曲奇店  曲奇鴨

 圖：餐廳IG

如果你都係自問有另一個胃負責甜品嘅朋友，媽閣斜巷呢間手工美式曲奇店就啱你喇～曲奇標榜以短時間高溫烘烤，令口感外脆內軟，而且有多款唔同口味同食材配搭，層次豐富。包括茉莉綠茶麻糬、薄荷流心朱古力、紅絲絨棉花糖、伯爵茶杏仁等等，即使之前掃街食到幾飽都係要食返件，配埋杯熱咖啡就係完美下午茶。