日本料理永遠都係香港人嘅Comfort food，而鍾意食席前日式Omakase嘅朋友最近又多個選擇喇！最近有一間高質親民嘅日式廚師發辦進駐尖沙咀棉登徑，餐廳主打親民又高質，午市設有兩款菜單，而晚市時段則設有三款菜單，分別為「和」($980)丶「彩」($1280)及「七寶」($1580)，豐儉由人！

餐廳由來自日本九州嘅資深大廚原田誠先生親自主理，有30年廚藝經驗嘅總廚原田誠先生將為餐廳菜單引入其家鄉九州嘅料理特色及新鮮食材，因為九州四面環海嘅關係，原田誠先生親自為食客搜羅無污染嘅上乘食材，令食客於香港都感受到九州風味。

「七寶」廚師發辦套餐($1580)

所有廚師發辦套餐都有前菜丶刺身丶特色時令煮物或燒物丶搭配壽司及卷物，食得多Omakase都知，供應啲咩就會跟返時令。

前菜鮑魚配鮑魚肝醬，選用大大隻澳洲鮑魚再切片，點埋用鮑魚肝製成嘅醬汁，啖啖都係鮮味。而喜之次配上明太子及海膽，燒過嘅喜之次魚油香突出，加埋鹹香嘅明太子及鮮甜海膽，層次又幾豐富。

魚類刺身方面有鰤魚及鰹魚刺身，另外仲有來自日本三陸赤崎嘅蠔，厚肉大隻兼鮮甜！

而A5熊本和王係其中一款招牌，選用來自日本九州熊本縣嘅牛種，必需飼養28個月以上，並獲得A5或A4以上等級，油花標準等級同時需達到6以上，先可以稱之為「和王」。油花分佈均勻亦同時帶有牛味，配埋甜甜地嘅自製醬汁食啱啱好！

壽司方面，招牌係呢個月見槍烏賊壽司，以溫泉鵪鶉玉子搭配有口感嘅烏賊，口感順滑而且啱晒打卡！

另外講到壽司又點少得吞拿魚，餐廳分別呈上來自青森大間嘅鮪赤身壽司、鮪中拖羅壽司及鮪大拖羅壽司，赤身食落一啲筋都無，中拖羅油分適中，而大拖羅入口即溶，三個部位都好出色。

而甲殼類方面就有肉質鮮彈嘅團扇海老及肥美鮮甜嘅緋扇貝。

煮物汁煮雉羽太其實即係石斑魚，彈牙有魚味；而燒物秋刀魚幽奄燒其實即係用江戶時代傳統製法去烹調秋刀魚，醬汁用照燒加柚子製成，味道甜甜地幾開胃。

鮨白鳥

地址: 尖沙咀棉登徑8號凱譽地下13號舖

文: Yanica

相、片: Tom Li