估唔到香港都有波斯菜食！可能大家對波斯菜有啲陌生，但其實係好多中東菜系起源嚟㗎。佢哋嘅料理都以天然香料、烤肉、蔬菜為主，係相當健康嘅飲食文化。今次介紹的"SAFFRON Persian Cuisine" 係波斯人Matin及Amin開設，他們居港10年發覺香港無波斯菜，加上受開餐廳嘅爺爺啟發，毅然開咗香港第一間波斯菜。
地道波斯菜文化，冷、暖食物一齊食先最平衡。
波斯飲食文化 平衡身心
而波斯菜更深入講究「食物平衡」—冷、暖食物互相平衡身體。試想像暖成分(如肉類、藏紅花、薑黃、胡椒等) 增加血壓；冷食物(如沙律、蘿蔔、核桃等) 則降血壓，兩者相衡令身心達致最佳狀態。講咗咁耐，其實想大家去"SAFFRON Persian Cuisine" 食波斯菜前，知道可以揀乳酪蘸醬、橄欖；同時又揀啲BBQ肉串、藏紅花飯 一齊食，真正體驗吓波斯菜文化。
波斯零油烤肉 多種香料醃數小時
呢度係清真認證餐廳，肉類以羊、牛、雞為主，並依波斯BBQ燒法，一滴油都唔使落，用火力將肉嘅油花逼出，香口惹味又健康。波斯菜特點之一係味道變化豐富，就算BBQ肉串驟眼睇無甚特別，其實用咗多種天然香料醃4至5小時，所以每啖都好有層次。
波斯烤肉一滴油都唔使落，並會用天然香料醃4至5小時。
波斯羊肉碎烤串配飯 Lamb Koobideh with Rice
Matin透露呢道波斯烤羊肉喺當地好受歡迎！羊肉串係100%純澳洲羊肉，唔會加入任何鬆肉粉。燒烤前則以香料醃製數小時，一上枱已經聞到好香。羊肉惹味唔羶，入口仲會爆出少許肉汁。
如果你細心留意會發現店名以藏紅花(SAFFRON) 命名，因為佢哋嘅米飯、雞肉同部分飲品，都加咗呢種全世界最矜貴香料。你見到金黃色米飯，正正係藏紅花飯喇。
羊肉串係100%純羊肉，喺波斯好受歡迎㗎。
【價值相等黃金】全世界最矜貴香料「藏紅花」
藏紅花作為最矜貴香料絕非虛名，其價值相等黃金。因為一定要人手採摘乾燥，而且大量藏紅花先製作到少量香料，其乾草香味、甜中帶鹹辣嘅香濃味道，成為香料界中嘅黃金。
呢度可單買藏紅花/茶葉，對健康好有益處㗎。
烤雞胸肉串配中東烤餅 Saffron Joojeh Kebab with Naan
如果你想試真藏紅花入饌味道，呢道烤雞胸肉就用咗藏紅花醃製，再燒至金黃輕焦。用中東烤餅包住，再加啲沙律、烤番茄、青椒食好有層次。
雞胸肉以藏紅花醃製，再燒至金黃輕焦。
波斯雞肉碎烤串配沙律 Chicken Koobideh with Salad
鍾意啖啖肉可以揀BBQ雞肉串，同樣用多種香料—香蒜、羅勒等醃數小時。而且全部醬都係用香料自家製，香蒜醬可以用嚟蘸雞肉；羅勒醬則拌沙律。
BBQ雞肉串用多種香料醃，啖啖肉。
雜錦烤肉串 Kebab Lovers
肉控想一次過試晒幾款BBQ肉，揀呢個雜錦烤肉串最抵食！有齊燒羊肉串、燒雞肉串、烤藏紅花雞胸肉、波斯風味燒烤雞翼，及2客沙律、藏紅花飯同各種配料，1道菜食勻多款料理呀。
有齊多款肉串，好抵食！
Gheymeh Bademjan
如果你想食得地道啲，呢道炖菜正正係Matin嘅童年回憶。佢憶述呢道炖菜好好食，但要邊煮邊攪拌4、5個鐘，所以細個時媽媽會留喺廚房煮幾個鐘，加上波斯家庭都有好多兄弟姐妹，每次媽媽都會端出好大煲㗎。
鍋內有燉到好軟腍嘅羊肉、黃碗豆、青檸乾同特製番茄醬。羊肉醃得好有香料層次，舀啲醬撈埋藏紅花飯一齊食好正。
充滿波斯人童年回憶嘅家庭料理。
呢度仲有多款波斯小食:
伊朗糯米雞 Dolmeh
乍看之下真係估唔到咩嚟，不過唔好心急打開呀，因為地道食法係連埋藤葉一齊食。入面有肉碎、碗豆、鷹嘴豆同香草，香料味濃又有綿密口感。
記住連埋藤葉食，最有風味。
波斯風味燒烤雞翼 Special BBQ Chicken Wings
雞翼以特製醬汁醃製，再以波斯BBQ方法燒好惹味。
波斯風味雞翼好惹味。
烤茄子泥配中東烤餅 Mirza Ghasemi
搶眼嘅太陽蛋下，係烤茄子、番茄、蒜蓉壓成嘅傳統茄子蓉，戳開蛋黃撈勻蛋漿，配埋中東烤餅食開胃健康。
茄子蓉撈勻蛋漿好綿滑，配烤餅食好夾。
文初提到嘅冷盤乳酪醬、沙律等，夾埋主菜一齊食可以平衡身心。
波斯風味青瓜乳酪蘸醬 Mast-O-Khiyar
自家製波斯乳酪，內裡有青瓜、新鮮薄荷葉，用烤肉蘸嚟食更有風味。
乳酪蘸醬配主菜一齊食，可平衡身心。
消費券優惠:
埋單9折優惠 (原價加一另計及午市套餐不適用)
SAFFRON Persian Cuisine
地址: 中環嘉咸街47-53號嘉利大廈地下E號舖
電話: 25959900
*每間指定餐廳支援的付款方式有所不同，詳情請向有關餐廳查詢。餐廳保留最終決定權。
