2023年已到！雖然日本旅遊之路似係困難重重，但相信勁鍾意「鄉下」嘅大家一定會排除萬難衝去嘅！成功飛到嘅當然都要照顧吓身邊人感受，買份三五七份手信🍬🍫🍪🥨畀自己畀朋友畀同事畀屋企人就唔少得，但唔好再買白之戀人同東京蕉Please🙏🏻！唔係好唔好食嘅問題，而係食得多真係冇咗嗰份驚喜！等我哋介紹返2022年東京駅🗼時下流行手信有咩啦！
📍GRANSTA
除非已經食過，否則建議買一盒有哂3款味嘅套裝 (每款4件，合共12件；2,484円)
呢款扮哂漢堡包仔咁勁得意嘅芝士朱古力餅，喺日本啲SNS可以話係非常常見。佢今年新出嘅東京駅分店限定草莓朱古力漢堡(6件；1,188円)，更創出1星期賣超過13,000件嘅驚人數字，今年手信界第一位真係捨得其誰！
🎁 Sable Michelle
📍大丸東京店1F
本身呢家店都專出勁可愛嘅酥餅 (Sablé)，但始終都係圓罐裝扮哂蛋糕嘅朱古力餅穩站銷量No.1，大家愛佢嘅外表之餘都鍾意塊餅入口超級酥脆似勁幼細嘅沙粒咁。留意返佢哋都經常做期間限量款，之前出過檸檬而最近就似相中嘅黑朱古力味(蛋糕餅6塊、牛油餅5塊、可可餅塊，合共15件；3,000円)。
🎁 Almond六本木
📍東京駅一番街
已經創業咗超過76年嘅老店於上年11月入駐東京駅一番街，佢哋一宣佈會推出拿破崙批就即刻有好多媒體報導。當然有鮮果個版本係唔方便大家帶返嚟做手信，所以我哋會建議大家買另一款可以常溫保存嘅Bon Napoleon，酥皮中間夾住酸酸甜甜嘅白朱古力忌廉(12件；2,592円)，惟一缺點係食時要好小心跌到成地都係餅碎。
🎁 PISTA＆TOKYO
📍東京駅一番街
開心果系列產品可以話近年去到邊都受歡迎，去東京一番街呢間專門店買返幾款真係唔會出事！但提一提大家，目前佢哋推出嘅店限定Pistage係只可以室溫3小時，而且同另一期間限定貨開心果朱古力凍蛋糕批一樣，每日只有2個時段上架，所以以上兩款想食就真係要買返酒店食喇！可以買返嚟派嘅建議揀返開心果曲奇(開心果同紅莓味各14塊；3,240円)或夾心餅，可選單買一種口味(6塊；1,296円)或者要埋有特色嘅紅莓開心果味(每款各5塊；2,160円)。
🎁 喫茶店に恋して。
📍GRANSTA
雖然睇個店名好似係好近年改嘅，但其實佢都係有返咁上下輩份(1979年)嘅洋菓子店。佢哋招牌作生焦糖布甸撻一睇都知又係拎唔到返香港，不過都好彩佢哋仲有唔使冷藏且保存期有14日嘅焦糖布甸迷你撻(8件；1,674円)！連個盒都係搵有名插畫家特別設計，成盒送畀特別嘅人真係加爆分！