炒辣蟹作為新加坡嘅代表，大家知唔知其實係點發明呢個食法呢？現時流行嘅版本係從1960年代由新加坡中餐「四大天王」之一嘅許國威改良，佢用辣椒醬汁、番茄醬同蛋液炒肉質相對比較緊實嘅青蟹，然後再搭配饅頭食用。香辛味成功襯托出蟹肉鮮甜，自此之後呢道菜式成功登堂入室，成為了大家去新加坡旅遊必食之選。

以下我哋會為大家介紹城中5家辣蟹店，大家準備好食蟹食到成手成面都污糟糟啦！

1.  螃蟹之家

於2008年開始營業，螃蟹之家出品以又大又多汁著稱，積聚咗一定人氣後因為太多人排隊躍躍欲試，政府認為影響咗附近交通而請佢哋搬到現址。之後，佢哋更喺2015年獲得「最受歡迎嘅黑胡椒炒蟹及鹹蛋黃(金沙)炒蟹」美譽，證明就算搬到再遠，大家都依然願意專程去一試，而且試過後都因其出色嘅味道而拍爛手掌！

📖網上訂位更方便：
https://s.openrice.com/eKKSB01ncS100~dJBV8_7bC

2. 珍寶海鮮

香港隻珍寶海鮮坊就沉沒咗，但其實同名餐廳(冇任何業務關係)可以喺新加坡搵到！仲要有好幾間分店！佢哋第一家店東海岸海鮮中心喺1987年開業，而遊客普遍都鍾情於可以邊欣賞河景邊大大啖食蟹嘅另外兩間分店。但無論選擇去邊間分店，繁忙時間用餐最緊要記得要預約！而且一定要叫酥脆嘅炸饅頭，唔使擔心食唔哂，因為佢係將所有精華吸盡嘅重要配菜！

📖網上訂位更方便：
https://s.openrice.com/eKKSB01QI0000~dku58go12

3. Kelly Jie Seafood

餐廳原名為 TPY Mellben (龍海鮮螃蟹王 大巴窯店)，坊間講法改名係為咗同宏茂橋店區分，但對食家嚟講名唔緊要，最重要食啲嘢食質素維持到！嚟呢度唔係食普通嘅炒蟹而係砂煲磅蟹米粉湯，好多食客都話索哂汁好好食而且連小朋友都食到！另外，呢度除咗米粉湯之外都仲有好多值得試嘅菜式如牛油豆腐、麥片蝦，一家大細嚟嘅絕對可以各取所需！

📖網上訂位更方便：
https://s.openrice.com/eKKSB01dZa200~dku58go12

4. Long Beach Seafood Restaurant

有個講法係呢間從1949年在另一地區創業，後來先搬過嚟嘅長堤海鮮樓係黑胡椒炒蟹真正嘅初創者。由於當地人相當捧場支持，之後佢哋都陸續喺唔同地點開分店，而且間間質素都穩定，有啲人會嚟慶祝生日甚至同客過嚟食住海鮮傾生意！黑胡椒炒蟹同辣蟹之外，呢度招牌菜仲有用白胡椒蟹、VSOP白蘭地醃製嘅醉蝦、炒青龍菜同蒜蓉蒸蟶子。

📖網上訂位更方便：
https://s.openrice.com/eKKSB01a24000~dku58go12

5. Majestic Bay Seafood Restaurant

雖然表面上與同實際上都係一間有大魚缸睇、有可愛點心嘅中菜廳，但如果大家有聽過名廚楊彬源 (Yong Bing Ngen)嘅大名，咁就唔難估到呢度有佢苦心研發，用3種咖啡豆製作出咖啡醬汁整成嘅咖啡蟹食！

📖網上訂位更方便：
https://s.openrice.com/eKKSB019SO000~dku58go12

OpenRice SG Editor